Albulena Haxhiu falënderon mërgatën për mbështetjen në zgjedhjet e 7 qershorit

Nënkryetarja e Vetëvendosjes shpreh mirënjohje për votuesit, mërgatën dhe aktivistët për mbështetjen në zgjedhjet e 7 qershorit

Pas përfundimit të procesit të numërimit të votave nga zgjedhjet e 7 qershorit, Albulena Haxhiu ka falënderuar qytetarët për pjesëmarrjen në procesin zgjedhor dhe për besimin e dhënë, përcjell albinfo.ch.

Përmes një postimi në rrjetet sociale, Haxhiu shprehu mirënjohje për të gjithë qytetarët që ushtruan të drejtën e votës, duke vlerësuar pjesëmarrjen e tyre si një element thelbësor të demokracisë.

Ajo falënderoi gjithashtu mërgatën që udhëtoi për të votuar, si dhe aktivistët që, sipas saj, kontribuuan gjatë gjithë fushatës duke takuar qytetarët dhe duke mbështetur angazhimin e subjektit politik.

“Faleminderit secilit që na besoi. Secilit që doli në vendvotim. Secilit që udhëtoi nga mërgata. Secilit aktivist që trokiti në dyer, foli me njerëz dhe i dha këtij rrugëtimi energjinë më të mirë”, ka shkruar Haxhiu.

Ajo theksoi se besimi i marrë nga qytetarët përbën njëkohësisht forcë dhe përgjegjësi, duke shtuar se ky mandat i obligon të punojnë më shumë, me drejtësi dhe më pranë nevojave të qytetarëve. /Albinfo.ch

---