Raporti i PE-së: Pesë shtetet e BE-së të njohin pavarësinë e Kosovës

Njohja e Kosovës nga pesë shtetet e BE-së, kërkesë në raportin e Parlamentit Evropian

Parlamenti Evropian ka miratuar të mërkurën në Bruksel raportin për Kosovën, duke riafirmuar mbështetjen për rrugën evropiane të vendit dhe duke u bërë thirrje pesë shteteve anëtare të Bashkimit Evropian që ende nuk e kanë njohur pavarësinë e Kosovës ta bëjnë këtë pa vonesë, përcjell albinfo.ch.

Raporti u miratua me 412 vota pro, 174 kundër dhe 58 abstenime. Lajmin e bëri të ditur raportuesi për Kosovën në Parlamentin Evropian, Riho Terras.

Dokumenti mbështet aplikimin e Kosovës për anëtarësim në Bashkimin Evropian, të dorëzuar në dhjetor të vitit 2022, dhe i kërkon Këshillit të BE-së që të ecë përpara me shqyrtimin e aplikimit, duke i dhënë vendit statusin e kandidatit sapo të përmbushen kriteret përkatëse.

Eurodeputetët u bëjnë thirrje gjithashtu pesë shteteve anëtare të BE-së që ende nuk e njohin Kosovën ta ndryshojnë këtë qëndrim, në mënyrë që vendi të mund të avancojë në procesin e integrimit evropian në kushte të barabarta me vendet e tjera kandidate.

Raporti vlerëson se zgjedhjet parlamentare të vitit 2025 janë zhvilluar në mënyrë të rregullt, por shpreh shqetësim për ngërçin politik që ka pasuar procesin zgjedhor. Sipas eurodeputetëve, vonesat në konstituimin e institucioneve mund të rrezikojnë përfitimin e fondeve nga Plani i Rritjes i Bashkimit Evropian.

Në dokument rikujtohet edhe opinioni i Gjykata Ndërkombëtare e Drejtësisë i vitit 2010, sipas të cilit shpallja e pavarësisë së Kosovës nuk ka shkelur të drejtën ndërkombëtare.

Raporti mirëpret gjithashtu deklaratën për bashkëpunim në fushën e mbrojtjes ndërmjet Kosovës, Shqipërisë dhe Kroacisë, duke e cilësuar atë si një hap të rëndësishëm për përballimin e kërcënimeve hibride të sigurisë në rajon.

Njëkohësisht, Parlamenti Evropian miratoi edhe raportin për Serbinë, ku kërkohet përparim në dialogun për normalizimin e marrëdhënieve me Kosovën, me synimin për arritjen e njohjes së ndërsjellë. Në raport i kërkohet gjithashtu Beogradit të mos pengojë anëtarësimin e Kosovës në organizata ndërkombëtare dhe shprehet shqetësim që Milan Radoičić ende nuk është vënë para drejtësisë për sulmin terrorist në Banjskë. /Albinfo.ch

---