Kosovë: Brenda dy ditësh pritet të përfundojë rinumërimi

Foto: KQZ

Zëdhënësi i Komisionit Qendror të Zgjedhjeve në Kosovë, Valmir Elezi, ka folur për procesin e rinumërimit i cili ka filluar gjatë ditës së sotme për 185 vendvotime të përzgjedhura në mënyrë rastësore në nivel vendi, për të parë nëse ka pasur ndonjë mospërputhje gjatë numërimit të votave.

Ai ka deklaruar se në bazë të dinamikës që po zhvillohet, rinumërimi pritet të përfundoj brenda dy ditësh.

“Natyrisht se para shpalljes së rezultateve përfundimtare, KQZ do të shqyrtojë gjetjet që do të dalin nga procesi i rinumërimit. Kjo do të thotë se pas përfundimit  të procesit të rinumërimit, do të përgatitet një raport i detajuar mbi gjetjet e evidentuara. Raporti do t’u paraqitet anëtarëve të KQZ-së për shqyrtim dhe vendimmarrje. Varësisht nga gjetjet dhe rekomandimet e përfshira në raport, KQZ do të vendosë për hapat e mëtejmë. Sipas dinamikës e cila po zhvillohet këtu në QNR besojmë që brenda dy ditësh do të përmbyllet rinumërimi i të gjitha këtyre vendvotimeve”, ka thënë ai, transmeton albinfo.ch.

Tutje, ai u shpreh se ky komision është i gatshëm që të shpall rezultatet përfundimate por duhet të pritet për afatet ligjore në rast se do të ketë ankesa nga partitë politike.

“Në versionin më të mirë, nëse nuk do të ketë ankesa, KQZ mund të procedojë me shpalljen e rezultateve përfundimtare, por nëse do të ketë, KQZ do të presë vendimmarrjen e PZAP-it dhe Gjykatës Supreme, të zbatojë vendimet e tyre nëse e obligojnë ndonjë gjë KQZ-në dhe pastaj të mund të procedojë me shpalljen e rezultateve përfundimtare”, ka deklaruar ai.