Vedat Muriqi: Rikthimi te Fenerbahçe është një krenari e madhe për mua

Sulmuesi i Kosovës thotë se është rikthyer më i pjekur dhe me më shumë përvojë, ndërsa synimi kryesor mbetet fitimi i titullit me klubin turk.

Sulmuesi i Kombëtares së Kosovës, Vedat Muriqi, është shprehur i lumtur për rikthimin te Fenerbahçe, duke e cilësuar këtë si një moment të veçantë në karrierën e tij, transmeton albinfo.ch.

Pas periudhës së kaluar në La Liga me Mallorcën, futbollisti kosovar është rikthyer në klubin nga Stambolli, ku kishte luajtur edhe gjatë sezonit 2019/2020.

Në një intervistë për televizionin zyrtar të Fenerbahçes, Muriqi tha se rikthimi në klub i ka zgjuar emocione të veçanta.

“Është një nder dhe krenari të jem këtu. E kam kuptuar sa shumë më kishte munguar ky klub dhe kjo atmosferë”, u shpreh ai.

Muriqi theksoi se përvoja e fituar në kampionatet evropiane e ka bërë një futbollist më të kompletuar dhe më të pjekur.

“Tash jam një lojtar tjetër, me më shumë përvojë, por edhe më i uritur për sukses”, deklaroi sulmuesi.

Ai shtoi se objektivi kryesor i Fenerbahçes në sezonin e ri është fitimi i titullit të kampionit, duke theksuar se do të japë kontribut maksimal për ekipin.

“Do të jap maksimumin, qoftë me gola, asistime apo punë në fushë. Synimi ynë është trofeu dhe besoj se mund ta arrijmë”, përfundoi Muriqi./Albinfo.ch

---