Haxhiu nga BE-ja kërkon statusin e vendit kandidat për Kosovën

Ushtruesja e detyrës së presidentes kërkoi që progresi i Kosovës në reforma të shpërblehet me hapjen e negociatave për anëtarësim në Bashkimin Evropian.

Ushtruesja e detyrës së presidentes së Kosovës, Albulena Haxhiu, ka kërkuar nga Bashkimi Evropian që progresi i Kosovës në zbatimin e reformave të reflektohet me hapa konkretë drejt integrimit evropian, transmeton albinfo.ch.

Gjatë takimit me Valentina Supertin, drejtoreshë për Ballkanin Perëndimor në Komisionin Evropian, Haxhiu theksoi se Kosova ka ndjekur një kurs të qartë të reformave, është plotësisht e harmonizuar me politikën e jashtme dhe të sigurisë të BE-së dhe po zbaton me seriozitet Agjendën e Reformave dhe Planin e Rritjes.

Sipas njoftimit të Presidencës, Haxhiu kërkoi që ky progres të marrë një përgjigje të qartë politike nga BE-ja përmes dhënies së statusit të vendit kandidat dhe hapjes së negociatave për anëtarësim.

Në takim u diskutua gjithashtu për zbatimin e marrëveshjeve të Procesit të Berlinit dhe rëndësinë e trajtimit të barabartë të Kosovës në përfaqësim rajonal, lidhje infrastrukturore, tregti, digjitalizim dhe qasje në iniciativat e tregut të përbashkët. /Albinfo.ch

---