Operacion i madh kundër krimit të organizuar në Kosovë, arrestohen nëntë persona

Gjatë aksionit të udhëhequr nga Prokuroria Speciale dhe Policia e Kosovës u kontrolluan 21 lokacione, ndërsa u sekuestruan para, automjete, armë, pajisje elektronike dhe prova të tjera.

Nëntë persona janë arrestuar në një operacion të gjerë kundër krimit të organizuar, të zhvilluar nga Prokuroria Speciale e Republikës së Kosovës dhe Policia e Kosovës, me asistimin e Dogana e Kosovës dhe Administrata Tatimore e Kosovës, përcjell albinfo.ch.

Sipas njoftimit të përbashkët të institucioneve, aksioni është realizuar në bazë të urdhrit të Gjykata Themelore në Prishtinë, gjatë të cilit janë kryer kontrolle në gjithsej 21 lokacione.

Gjatë operacionit, autoritetet kanë sekuestruar rreth 15 mijë euro para të gatshme, pesë vetura, pesë autobotë për transportin e derivateve të naftës, dy armë zjarri, 54 fishekë, pajisje elektronike, dokumente të ndryshme dhe prova të tjera që lidhen me rastin.

Po ashtu, janë sekuestruar edhe 301 euro në kartëmonedha prej 2 eurosh, të cilat dyshohet se janë të falsifikuara.

Personat e arrestuar me inicialet F.M., F.M., M.M., S.K., N.B., D.M., A.M., N.M. dhe G.Q. dyshohen për disa vepra penale, përfshirë shpëlarje parash, kontrabandim mallrash në bashkëkryerje, pjesëmarrje ose organizim të grupit kriminal të organizuar, përdorim të dokumenteve të rreme lidhur me tatimin dhe shmangie nga tatimi.

Sipas institucioneve të drejtësisë, hetimet kanë krijuar dyshimin e arsyeshëm se të dyshuarit kanë vepruar si një grup i strukturuar kriminal, duke përdorur dokumente të rreme tatimore dhe duke realizuar shitje e transaksione fiktive të derivateve të naftës, me qëllim përfitimin e kundërligjshëm.

Autoritetet kanë bërë të ditur se hetimet për rastin janë duke vazhduar dhe se priten veprime të tjera procedurale. /Albinfo.ch

---