Nis aksioni për rrënimin e 11 villave në pronën e Ibër-Lepencit në Ujman

Aksion në Ujman: Policia asiston rrënimin e 11 shtëpive të pushimit

Policia e Kosovës ka nisur mëngjesin e së mërkurës asistimin në një aksion për rrënimin e 11 shtëpive të pushimit në zonën e njohur si “Plazha e Shqiptarëve”, në Ujman, në komunën e Zubin Potokut, përcjell albinfo.ch.

Zëvendësdrejtori i Policisë për rajonin e veriut, Veton Elshani, ka bërë të ditur se aksioni ka filluar rreth orës 07:00, me kërkesë të ndërmarrjes publike “Ibër-Lepenci” dhe Ministrisë së Mjedisit, Planifikimit Hapësinor dhe Infrastrukturës.

“Sot nga ora 07:00 kemi filluar asistimin e Ibër-Lepencit dhe Ministrisë së Mjedisit dhe Planifikimit Hapësinor. Jemi duke asistuar në vendin e quajtur ‘Plazha e Shqiptarëve’, në Ujman, Zubin Potok, ku është planifikuar të rrënohen 11 shtëpi pushimi (vikendica)”, deklaroi Elshani.

Autoritetet nuk kanë dhënë ende detaje shtesë lidhur me arsyet e rrënimit apo statusin ligjor të objekteve, ndërsa aksioni po zhvillohet nën masa të shtuara sigurie. /Albinfo.ch

---