Gjendet i pajetë në Morinë polici i Kosovës

Polici i Kosovës gjendet i vdekur në Morinë, dyshohet për vetëvrasje

Një zyrtar i Policisë së Kosovës është gjetur pa shenja jete mëngjesin e së martës në varrezat e fshatit Morinë, në Kukës, përcjell albinfo.ch.

Sipas Policisë së Shtetit, rreth orës 08:25 është konstatuar i pajetë një 35-vjeçar nga Prizreni, i cili shërbente si pjesëtar i Njësisë së Reagimit të Shpejtë në Policinë e Kosovës.

Nga veprimet e para hetimore dyshohet se ai ka humbur jetën si pasojë e një vetëvrasjeje me armë zjarri. Arma është sekuestruar në cilësinë e provës materiale.

Nën drejtimin e Prokurorisë, një grup i posaçëm hetimor po punon për zbardhjen e plotë të rrethanave të ngjarjes.

Policia e Shtetit ka bërë të ditur se është në bashkëpunim me Policinë e Kosovës për të verifikuar nëse arma e sekuestruar ishte arma e shërbimit të efektivit, si dhe për të siguruar të gjitha të dhënat që do të ndihmojnë në dokumentimin e plotë të rastit./Albinfo.ch

---