Kurti takon deputeten shqiptare në Bernë, vlerëson rolin e mërgatës në politikën zvicerane

Kryeministri në detyrë diskutoi me Shasime Osmanin për arsimin dual, fuqizimin e grave dhe bashkëpunimin ndërmjet Kosovës dhe Zvicrës.

Kryeministri në detyrë i Kosovës, Albin Kurti, ka pritur në takim Shasime Osmanin, e cila së fundmi është zgjedhur deputete në Parlamentin Kantonal të Bernës në Zvicër, përcjell albinfo.ch.

Përmes një postimi në Facebook, Kurti tha se Osmani është një zë i angazhuar për edukimin dhe drejtësinë sociale, ndërsa gjatë takimit u diskutua për një sërë temash me interes të përbashkët.

Sipas tij, biseda u përqendrua te arsimi, me theks të veçantë te sistemi dual që po zbatohet edhe në Kosovë, rëndësia e barazisë gjinore, fuqizimi i grave në politikë, si dhe bashkëpunimi i ngushtë ndërmjet Kosovës dhe Zvicrës.

Kurti theksoi gjithashtu se mërgata shqiptare në Zvicër po luan një rol gjithnjë e më të rëndësishëm në institucionet e vendit dhe në proceset vendimmarrëse.

“Mërgata jonë në këtë shtet mik, dhe jo vetëm, gjithnjë e më shumë po merr rol në institucione dhe po bëhet pjesë e vendimmarrjes”, ka shkruar Kurti. /Albinfo.ch

---