LDK është e gatshme për marrëveshje me Vetëvendosjen, nëse respektohen tri parime

Haziri: Nëse ka vullnet nga LVV-ja, LDK-ja i përmbyll për 24 orë të gjitha çështjet parimore

Nënkryetari i LDK-së thotë se partia është e hapur për bashkëpunim me LVV-në për formimin e institucioneve, por vetëm nëse marrëveshja përfshin të gjitha institucionet dhe bazohet në parimet e dakorduara, përcjell albinfo.ch.

Nënkryetari i Lidhjes Demokratike të Kosovës (LDK), Lutfi Haziri, ka deklaruar se partia e tij është e gatshme të bashkëpunojë me Lëvizjen Vetëvendosje për formimin e institucioneve të reja, nëse respektohen tri parimet e vendosura nga LDK-ja.

Në një intervistë për Radion Evropa e Lirë, Haziri tha se gjatë Kuvendit të LDK-së, të mbajtur më 20 korrik, është arritur pajtim që subjekti të vazhdojë negociatat me partinë e kryeministrit në detyrë, Albin Kurti.

Sipas tij, LDK-ja ka vendosur tri kushte kryesore për një marrëveshje eventuale: marrëveshje për të gjitha institucionet – Kuvendin, Qeverinë dhe Presidencën – ose asnjë, dakordim për agjendën shtetërore dhe programin qeverisës, si dhe ndarjen e përgjegjësive institucionale.

“Këto tri parime neve na bashkojnë si Grup Parlamentar. Kuvendi i LDK-së ka kërkuar që kjo e drejtë të ushtrohet deri në fund. Se si do të përmbyllet kjo kërkesë, tani është çështje e negociatave”, është shprehur Haziri.

Ai theksoi se këto parime i janë prezantuar Vetëvendosjes që në takimin e parë formal mes Albin Kurtit, Lumir Abdixhikut dhe ish-presidentes Vjosa Osmani më 10 korrik.

Sipas Hazirit, tani i mbetet LVV-së të tregojë nëse është e gatshme t’i pranojë këto parime në bisedimet e ardhshme.

“Nëse ka vullnet politik dhe gatishmëri nga LVV-ja, LDK-ja i përmbyll për 24 orë të gjitha çështjet parimore. Neve nuk na ndan asgjë, ndërsa ndarja e përgjegjësive është krejt e fundit”, tha ai.

Haziri shprehu besimin se Grupi Parlamentar i LDK-së do të arrijë unitet rreth çdo marrëveshjeje që mund të arrihet me Vetëvendosjen.

Negociatat ndërmjet dy partive u pezulluan më 15 korrik për shkak të zhvillimeve të brendshme në LDK, ku një pjesë e zyrtarëve kërkuan shkarkimin e kryetarit Lumir Abdixhiku. Megjithëse Abdixhiku e ruajti postin, dallimet brenda partisë mbeten të dukshme.

Ndërkohë, me më pak se një javë deri në seancën konstituive të Kuvendit, të caktuar për 6 gusht, një marrëveshje ndërmjet LVV-së dhe LDK-së ende nuk është arritur. /Albinfo.ch

---