Edhe sot takim mes Kurtit dhe Abdixhikut, në fokus formimi i institucioneve

Takim i ri sot mes Kurtit dhe Abdixhikut për formimin e institucioneve

Kryeministri në detyrë, Albin Kurti, dhe kryetari i Lidhjes Demokratike të Kosovës (LDK), Lumir Abdixhiku, pritet të takohen sërish sot në kuadër të përpjekjeve për arritjen e një marrëveshjeje politike për formimin e institucioneve të reja të Kosovës, përcjell albinfo.ch.

Sipas raportimeve në media, takimi pritet të zhvillohet gjatë ditës, vetëm një ditë para seancës konstituive të Kuvendit të Kosovës, e cila është caktuar për të enjten, më 6 gusht, në orën 10:00.

Kurti dhe Abdixhiku u takuan edhe të martën, në një takim që zgjati rreth tri orë, por që përfundoi pa një marrëveshje konkrete. Megjithatë, pas përfundimit të bisedimeve, të dy liderët e cilësuan diskutimin si konstruktiv dhe lanë të hapur mundësinë për vazhdimin e dialogut.

Takimi i sotëm konsiderohet i rëndësishëm, pasi vjen në prag të konstituimit të Kuvendit, në një kohë kur partitë politike po intensifikojnë përpjekjet për krijimin e institucioneve të reja pas zgjedhjeve.

Vetëvendosje, si partia fituese e zgjedhjeve, është në kërkim të mbështetjes për sigurimin e shumicës parlamentare, ndërsa LDK mbetet e vetmja parti opozitare që ka vazhduar dialogun me partinë e Albin Kurtit për një marrëveshje të mundshme politike. /Albinfo.ch

---