Rreth një mijë bashkatdhetarë vizituan Kuvendin e Kosovës

Përgjatë tri ditëve, rreth një mijë bashkatdhetarë nga vende të ndryshme të botës vizituan Kuvendin e Republikës së Kosovës, në kuadër të aktivitetit tradicional “Bashkatdhetarët në Kuvend”.

Gjatë vizitës së sotme, bashkatdhetarët u pritën nga Kryetarja e Kuvendit të Republikës së Kosovës, U.D. Presidente Albulena Haxhiu. Ata patën mundësi të takohen edhe me deputetë dhe zyrtarë të administratës së Kuvendit, të cilët i informuan për mënyrën e funksionimit, përgjegjësitë dhe rolin e Kuvendit si institucioni më i lartë përfaqësues dhe ligjvënës i vendit.

Në kuadër të vizitës, bashkatdhetarët u njohën nga afër me ambientet e Kuvendit, përfshirë sallën plenare, si dhe me historikun dhe rëndësinë e këtij institucioni në zhvillimin demokratik të Kosovës. Në ditën e tretë, vizita në sallën plenare u ndërpre për disa minuta, pasi deputetë të PDK-së dhe AAK-së kishin zënë sallën në një kohë kur nuk ishte e thirrur asnjë seancë.

Aktiviteti tre-ditor krijoi mundësi për bashkëbisedim të drejtpërdrejtë ndërmjet mërgimtarëve dhe përfaqësuesve të zgjedhur të qytetarëve, duke mundësuar shkëmbimin e ideve dhe mendimeve.

Përmbyllja e aktivitetit “Bashkatdhetarët në Kuvend” përcolli mesazhin e rëndësishëm për ruajtjen dhe forcimin e lidhjeve ndërmjet Kosovës dhe mërgatës së saj.