Veprimtarë dhe intelektualë shqiptaro-amerikanë mbështesin Bekim Sejdiun për president të Kosovës

28 veprimtarë dhe intelektualë shqiptarë në SHBA u kanë bërë thirrje liderëve politikë dhe deputetëve të Kuvendit të Kosovës që ta mbështesin kandidaturën e Prof. Dr. Bekim Sejdiut për president.

Një grup prej 28 veprimtarësh dhe intelektualësh shqiptarë në Shtetet e Bashkuara të Amerikës kanë shprehur mbështetje për kandidaturën e Prof. Dr. Bekim Sejdiut për president të Republikës së Kosovës, përcjell albinfo.ch.

Në një letër drejtuar liderëve të partive politike dhe deputetëve të Kuvendit të Kosovës, nënshkruesit kanë bërë thirrje për mbështetjen dhe zgjedhjen e Sejdiut në postin e presidentit.

Ata kanë thënë se e kanë përcjellë nga afër procesin e nominimit presidencial dhe kanë vlerësuar përvojën e Sejdiut si diplomat dhe ish-gjyqtar i Gjykatës Kushtetuese të Kosovës.

Sipas tyre, përvoja profesionale dhe integriteti i tij janë të rëndësishme për forcimin e unitetit institucional të Kosovës, si dhe për avancimin e marrëdhënieve me Shtetet e Bashkuara.

Një pjesë e nënshkruesve kanë deklaruar se kanë punuar me Sejdiun gjatë periudhës kur ai shërbeu si Konsull i Përgjithshëm i Kosovës në New York.

“Dr. Sejdiu luajti një rol të rëndësishëm në afrimin e diasporës shqiptare në SHBA me Kosovën. Ne punuam pa u lodhur për organizimin e aktiviteteve kulturore, hapjen e shkollave në gjuhën shqipe dhe lobimin për Kosovën në qarqet më të larta politike në New York dhe Washington, D.C.”, thuhet në letër.

Veprimtarët dhe intelektualët kanë vlerësuar se Kosovës, në rrethanat aktuale, i nevojitet një president që gëzon respekt institucional dhe ka një përvojë të dëshmuar në shërbim publik.

Ata kanë veçuar gjithashtu përgatitjen juridike dhe përvojën diplomatike të Sejdiut, duke e konsideruar atë kandidat të përshtatshëm për përfaqësimin e Kosovës në arenën ndërkombëtare dhe për forcimin e lidhjeve me partnerët strategjikë.

Në fund të letrës, grupi u ka bërë thirrje të gjitha partive politike të përfaqësuara në Kuvend që të bashkohen në mbështetje të kandidaturës së Sejdiut, me synimin për të kontribuar, sipas tyre, në një të ardhme më të qëndrueshme dhe më të prosperuar për Kosovën.

Në mesin e 28 nënshkruesve janë Harry Bajraktari, Vehbi Bajrami, Ekrem Bardha, Elmi Berisha, Mark Gjonaj, Joe Haliti, Richard Lukaj, Gani Shehu, Beqir Sina dhe Jim Xhema. /Albinfo.ch

---