Shqipëria kryeson botën për progresin më të shpejtë në turizëm, sipas indeksit të WEF

Raporti i Forumit Ekonomik Botëror vlerëson përmirësimet në infrastrukturën ajrore dhe shërbimet turistike, ndërsa çmimet më të përballueshme e kanë bërë Shqipërinë një destinacion gjithnjë e më tërheqës

Shqipëria është renditur në krye të vendeve me përmirësimin më të madh në sektorin e turizmit në botë, sipas edicionit të vitit 2026 të Indeksit të Zhvillimit të Udhëtimeve dhe Turizmit (TTDI) të Forumit Ekonomik Botëror (WEF), raporton “Euronews”, përcjell albinfo.ch.

Sipas raportit, Shqipëria ka shënuar një rritje prej 7 për qind të rezultatit të saj në indeks gjatë dy viteve të fundit, duke regjistruar progresin më të madh ndër vendet e përfshira në renditje.

Përmirësimi është lidhur veçanërisht me zhvillimin e infrastrukturës së transportit ajror dhe shërbimeve turistike. Raporti thekson gjithashtu se Shqipëria ka përfituar nga çmimet më të përballueshme në krahasim me disa destinacione fqinje, duke ruajtur njëkohësisht një ofertë tërheqëse për turistët.

Në renditjen e përgjithshme të TTDI 2026, Japonia është pozicionuar në vendin e parë, ndërsa Shqipëria është veçuar për progresin më të madh në krahasim me edicionin e mëparshëm.

Në dhjetëshen e parë të renditjes së përgjithshme dominojnë vendet evropiane. Pas Japonisë renditen Shtetet e Bashkuara, Spanja, Franca, Australia, Gjermania, Mbretëria e Bashkuar, Kina, Zvicra dhe Italia.

Indeksi i Forumit Ekonomik Botëror analizon faktorët dhe politikat që ndikojnë në zhvillimin e qëndrueshëm të sektorit të udhëtimeve dhe turizmit. Vlerësimi përfshin fusha të tilla si infrastruktura e transportit ajror, konkurrueshmëria e çmimeve, siguria, transporti publik, kërkesat për viza dhe pasuritë kulturore e natyrore, përfshirë numrin e vendeve të Trashëgimisë Botërore të UNESCO-s.

Sipas Forumit Ekonomik Botëror, kushtet që mundësojnë zhvillimin e sektorit të udhëtimeve dhe turizmit janë në nivelin më të lartë që nga periudha e pandemisë. Ramya Krishnaswamy, drejtuese e sektorit të Ekonomisë së Përvojës, Udhëtimeve dhe Turizmit në WEF, tha se 92 për qind e ekonomive të analizuara kanë shënuar përmirësim që nga viti 2024.

Ajo theksoi se sfida e ardhshme nuk lidhet vetëm me rritjen e numrit të vizitorëve, por edhe me krijimin e më shumë vlerës përmes investimeve në njerëz, infrastrukturë dhe bashkëpunimit ndërmjet sektorit publik dhe atij privat.

Sipas indeksit, pas Shqipërisë, vendet me përmirësimin më të shpejtë në zhvillimin e turizmit janë Vietnami, Laosi, Katari, Malajzia, Tajlanda, Filipinet, Maroku, Nepali dhe Sri Lanka./Albinfo.ch

---