Elbenita Kajtazi vlerësohet në skenën e Staatsoper Hamburg

Sopranoja shqiptare shkëlqen në rolin e Donna Anna-s, ndërsa kritiku gjerman Dr. Ralf Wegner e cilëson këngëtaren më të spikatur të mbrëmjes

Sopranoja shqiptare Elbenita Kajtazi ka marrë vlerësime të larta për paraqitjen e saj në skenën e Hamburg State Opera, ku është paraqitur në rolin e Donna Anna-s në operën “Don Giovanni”, transmeton albinfo.ch.

Performanca e saj është vlerësuar veçanërisht për interpretimin vokal, kontrollin teknik dhe mënyrën e trajtimit të pjesëve dramatike dhe koloraturave.

Kritiku i muzikës klasike Dr. Ralf Wegner, përmes Klassik-begeistert.de, e ka cilësuar Kajtazin si këngëtaren më të spikatur të mbrëmjes.

Në vlerësimin e tij, Wegner veçon interpretimin e pasazheve dramatike, të cilat kërkojnë një nivel të lartë teknik vokal, si dhe koloraturat e shpejta të aries “Non mi dir”.

Ai vlerëson gjithashtu “kulturën e jashtëzakonshme të legatos” së Kajtazit dhe mënyrën se si ajo arrin t’i japë jetë interpretimit përmes zërit.

“Këngëtarja më e spikatur e mbrëmjes ishte Elbenita Kajtazi si Donna Anna”, shkruan Wegner në kritikën e tij, duke e përshkruar interpretimin e saj si jashtëzakonisht mbresëlënës.

Vlerësimi vjen në një prej skenave të rëndësishme të operës në Gjermani dhe i shtohet një serie paraqitjesh ndërkombëtare të soprano-s shqiptare, transmeton tutje albinfo.ch.

Roli i Donna Anna-s në “Don Giovanni” konsiderohet një nga rolet e rëndësishme të repertorit për soprano, duke kërkuar një kombinim të teknikës vokale, forcës dramatike dhe kontrollit të lartë të zërit.

Për Kajtazin, kjo paraqitje përfaqëson një tjetër moment të rëndësishëm në karrierën e saj ndërkombëtare, ndërsa vlerësimi i kritikës gjermane e vendos interpretimin e saj në qendër të vëmendjes së publikut dhe kritikës së specializuar.

Nga skenat ndërkombëtare të operës, Elbenita Kajtazi vazhdon kështu të përfaqësojë me sukses artin shqiptar, duke ndërtuar një karrierë të bazuar në formimin profesional, interpretimin vokal dhe prezencën në skenat prestigjioze evropiane./Albinfo.ch

---