BE përgatit planin për integrim gradual të vendeve kandidate në tregun evropian

Komisioni Evropian po shqyrton një mekanizëm që do t’u mundësojë vendeve kandidate të përfitojnë gradualisht nga tregu i përbashkët i BE-së, edhe para anëtarësimit të plotë

Bashkimi Evropian po përgatit një plan të ri që synon t’u mundësojë vendeve kandidate të integrohen gradualisht në tregun e përbashkët evropian, edhe para anëtarësimit të tyre të plotë në Union, transmeton albinfo.ch.

Sipas një dokumenti të Komisionit Evropian, të siguruar nga POLITICO, vendet kandidate do të mund të përfitojnë nga lehtësimi i tregtisë me BE-në, pjesëmarrja në programe kërkimore dhe forma të tjera të bashkëpunimit ekonomik, ndërsa vazhdojnë procesin e anëtarësimit.

Komisioni Evropian e konsideron tregun e përbashkët si një prej mjeteve kryesore për përshpejtimin e konvergjencës ekonomike ndërmjet vendeve kandidate dhe shteteve anëtare të BE-së.

Plani parasheh një proces të quajtur “integrim gradual”, përmes të cilit vendet që përmbushin kushtet rregullatore dhe kanë kapacitete të mjaftueshme për zbatimin e tyre do të mund të marrin pjesë më thellë në fusha të caktuara të ekonomisë evropiane.

Shqipëria, Ukraina, Moldavia dhe Mali i Zi në fokus

Sipas dokumentit, Shqipëria, Ukraina, Moldavia dhe Mali i Zi pritet të marrin “udhërrëfyes” të posaçëm për përshpejtimin e procesit të integrimit në vitet e ardhshme.

Për vendet e tjera kandidate të Ballkanit Perëndimor, përfshirë Kosovën, Maqedoninë e Veriut, Bosnje-Hercegovinën dhe Serbinë, procesi i anëtarësimit ka avancuar më ngadalë.

Komisioni Evropian argumenton se integrimi më i hershëm ekonomik do të krijonte mundësi të reja për bizneset evropiane, do të forconte zinxhirët e furnizimit dhe do të ndihmonte në reduktimin e varësive strategjike.

Përfitimet do të jenë të kushtëzuara

Hyrja graduale në tregun e përbashkët nuk do të jetë automatike. Sipas planit të propozuar, përfitimet mund të pezullohen ose të tërhiqen në rast se vendet kandidate nuk i përmbushin detyrimet e përcaktuara.

Ndër kushtet e parashikuara është edhe përafrimi me objektivat e politikës së jashtme dhe të sigurisë së BE-së.

Një tjetër element i rëndësishëm lidhet me mbrojtjen e teknologjive sensitive dhe kontrollin e eksporteve. Dokumenti parashikon gjithashtu vlerësimin e rreziqeve që lidhen me infrastrukturën kritike, zinxhirët e furnizimit dhe varësitë strategjike.

Plani i Komisionit Evropian synon kështu që vendet kandidate të kenë mundësi të përfshihen gradualisht në pjesë të ekonomisë së BE-së, duke e lidhur përfitimin ekonomik me përmbushjen e standardeve dhe detyrimeve të procesit të anëtarësimit./Albinfo.ch

---