Protestat në Shqipëri kanë hyrë në ditën e tretë, me pjesëmarrjen edhe të nxënësve të shkollave të mesme, të cilët kanë bojkotuar mësimin dhe kanë dalë në rrugët e Tiranës. Gjatë tubimeve janë raportuar akte vandalizmi, përfshirë dëmtimin e shenjave të trafikut, ndërsa policia ka nisur shoqërimet e para, përcjell albinfo.ch.
Sipas raportimeve mediatike, situata në kryeqytet mbetet e tensionuar pas përplasjeve të dy ditëve të mëparshme mes protestuesve dhe Policisë së Shtetit. Gjatë protestës së 14 tetorit, demonstruesit hodhën mjete piroteknike dhe sende të forta drejt institucioneve, ndërsa në disa zona pati zjarrvënie dhe dëme materiale.
Policia ndërhyri për shpërndarjen e turmave me gaz lotsjellës dhe autobotë me ujë. Përveç dëmtimeve të pronës publike dhe private, incidentet kanë nxitur reagime për mënyrën e menaxhimit të protestave dhe përdorimin e forcës nga policia.
Gjimnazistët e Elbasanit në solidaritet me protestuesit
Lëvizja e nxënësve nuk është kufizuar vetëm në Tiranë. Gjimnazistë në Elbasan kanë bojkotuar mësimin dhe janë mbledhur në sheshin qendror të qytetit, duke shprehur solidaritet me protestuesit në kryeqytet.
Pjesëmarrja e nxënësve të shkollave të mesme shënon një zgjerim të protestave, të cilat fillimisht u lidhën me kërkesat e studentëve për përmirësimin e kushteve në universitete, uljen e kostove të studimeve dhe rritjen e mbështetjes financiare.
Me kalimin e ditëve, pakënaqësitë janë shtrirë edhe te qeverisja dhe akuzat për korrupsion, duke e zgjeruar përmbajtjen e protestave përtej çështjeve të arsimit.
Raportohen dëmtime dhe shoqërime nga policia
Pamjet e publikuara nga protestat e sotme tregojnë akte shkatërrimi dhe dëmtime të elementeve të infrastrukturës rrugore. Ndërkohë, sipas raportimeve të mediave shqiptare, policia ka nisur shoqërimin e disa personave.
Zhvillimet e 15 tetorit pritet të tregojnë nëse protestat do të vazhdojnë të zgjerohen dhe nëse situata do të qetësohet pas dy ditëve të përplasjeve në Tiranë. /Albinfo.ch
