Protestat studentore në Tiranë, të nisura kundër kostove të larta të arsimit, kushteve në universitete dhe korrupsionit, kanë eskaluar në përleshje dhe akte vandalizmi, duke përfshirë sulme ndaj disa ndërtesave shtetërore, përcjell albinfo.ch.
Sipas mediave zvicerane 20 Minuten, Blick dhe SRF, gjatë protestave të së martës dhe të mërkurës, demonstruesit kanë sulmuar institucione në kryeqytetin shqiptar, ndërsa në disa prej ndërtesave janë raportuar zjarre dhe dëme materiale.
Sipas raportimit të Blick, një turmë e madhe protestuesish është mbledhur të mërkurën në mbrëmje para selisë së kryeministrit Edi Rama. Fillimisht, ndërtesa është goditur me gurë, ndërsa më pas janë raportuar zjarre në afërsi të saj. Pamje të publikuara në rrjetet sociale kanë treguar flakë pranë kompleksit qeveritar.
Ndërkohë, 20 Minuten raporton se protestuesit kanë ndezur zjarr në Ministrinë e Arsimit dhe në afërsi të zyrës së kryeministrit. Sipas së njëjtës media, disa persona janë përpjekur të hyjnë me forcë edhe në ndërtesën e Kryesisë së Kuvendit, ndërsa policia ka ndërhyrë me gaz lotsjellës dhe topa uji.
Dëme në disa institucione, raportohet për të arrestuar dhe të lënduar
Sipas Blick, përveç selisë së kryeministrit, janë dëmtuar edhe ndërtesa të tjera qeveritare. Protestuesit kanë hyrë në ambientet e Ministrisë së Ekonomisë, ku janë dëmtuar dyer dhe mobilie, ndërsa është raportuar edhe për zjarr në një degë bankare pranë Ministrisë së Arsimit.
Edhe SRF raporton se gjatë protestave janë shënuar dëme në dyqane dhe banka, si dhe sulme ndaj ndërtesës së administratës së qytetit. Sipas kësaj mediaje, gjatë trazirave janë shoqëruar nga policia rreth 40 persona, ndërsa 13 persona, përfshirë gjashtë policë, kanë pësuar lëndime.
Protestat fillimisht ishin zhvilluar në mënyrë paqësore, por situata është përshkallëzuar më vonë, kur demonstruesit kanë hedhur gurë dhe objekte të tjera. Policia ka përdorur gaz lotsjellës, topa uji dhe shkopinj gome për të shpërndarë turmën.
Sipas SRF, pas raportimeve për përdorim joproporcional të forcës dhe sulme ndaj personave të papërfshirë në protesta, pesë zyrtarë policorë janë pezulluar nga detyra.
Protestat kanë për qëllim kundërshtimin e kostove të larta të arsimit, kushteve të studimit dhe mungesës së perspektivave profesionale për të rinjtë. Demonstruesit kanë kërkuar gjithashtu dorëheqjen e kryeministrit Edi Rama, i cili udhëheq vendin që nga viti 2013.
Zëvendëskryeministrja e Shqipërisë, Albana Koçiu, i ka dënuar aktet e dhunës, duke theksuar se protesta është një e drejtë legjitime, por nuk mund të shërbejë si arsyetim për shkatërrimin e qytetit dhe përleshjet në rrugë, raporton SRF.
Ndërkaq, sipas 20 Minuten, përfaqësia e Bashkimit Evropian në Shqipëri ka shprehur shqetësim për përshkallëzimin e dhunshëm dhe ka bërë thirrje për qetësimin e situatës./Albinfo.ch
