Në një përgjigje me shkrim për agjencinë ndërkombëtare të lajmeve Reuters, Rama ka theksuar se ndryshimi i qeverisë duhet të bëhet përmes zgjedhjeve demokratike dhe jo përmes protestave që synojnë rrëzimin e saj, përcjell albinfo.ch.
“Sa u përket thirrjeve për dorëheqjen time, qeveritë ndërrohen përmes zgjedhjeve demokratike. Ne patëm zgjedhje vitin e kaluar, jo revolucion”, ka deklaruar Rama.
Kryeministri ka thënë se përgjegjësia e tij është të dëgjojë qytetarët, t’u përgjigjet shqetësimeve të tyre legjitime dhe ta mbajë Shqipërinë në rrugën e përparimit.
Ai ka shtuar se dorëheqja do të nënkuptonte, sipas tij, tradhtimin e mandatit që qytetarët i kanë dhënë për të përfunduar negociatat për anëtarësimin e Shqipërisë në Bashkimin Evropian.
Protestat janë nxitur nga pakënaqësitë e studentëve për kostot e larta të arsimit, kushtet e studimit dhe korrupsionin. Demonstruesit kanë kërkuar gjithashtu largimin e Ramës nga pushteti.
Gjatë protestave, policia ka përdorur topa uji për të shpërndarë turmën, ndërsa janë raportuar thyerje xhamash dhe dëmtime të pronës në kryeqytet. Për shkak të situatës së krijuar, Kuvendi i Shqipërisë ka anuluar seancën e planifikuar për atë ditë.
Rama është shprehur i gatshëm të diskutojë për shqetësimet që lidhen me rritjen e kostos së arsimit, por ka dënuar sulmet ndaj institucioneve, shkatërrimin e pronës publike dhe veprimet që, sipas tij, rrezikojnë sigurinë publike.
Këto protesta përbëjnë një sfidë të rëndësishme për kryeministrin shqiptar, i cili vitin e kaluar fitoi mandatin e katërt në krye të qeverisë.
Ndërkohë, trazirat vijnë pas disa muajsh protestash kryesisht paqësore, të nxitura edhe nga kundërshtimet ndaj një projekti për ndërtimin e një resorti luksoz në bregdetin jugor të Shqipërisë. Projekti, i mbështetur nga Jared Kushner, dhëndri i presidentit amerikan Donald Trump, është përballur me sfida ligjore.
Duke iu referuar çështjes së korrupsionit, Rama ka deklaruar se luftimi i tij mbetet një nga prioritetet e qeverisë, duke pretenduar se Shqipëria po bën më shumë përpjekje në këtë drejtim se kurrë më parë./Albinfo.ch
