Bashkimi Evropian ka reaguar ndaj tensioneve dhe përplasjeve të fundit gjatë protestave në Shqipëri, duke shprehur kundërshtimin ndaj akteve të dhunës dhe dëmtimit të pronës. Delegacioni i BE-së në Tiranë u ka bërë thirrje protestuesve të tregojnë vetëpërmbajtje dhe të ushtrojnë të drejtat e tyre në mënyrë paqësore, përcjell albinfo.ch.
Në reagimin e tij, delegacioni evropian ka theksuar se dhuna nuk ka vend në një shoqëri demokratike, ndërsa ka dënuar shkatërrimin e pronës publike dhe private gjatë demonstratave.
“U bëjmë thirrje protestuesve të tregojnë vetëpërmbajtje dhe të shmangin çdo akt dhune. Dhuna nuk ka vend në demokraci”, thuhet në deklaratën e BE-së.
BE-ja kërkon dialog për zgjidhjen e shqetësimeve
Delegacioni evropian ka rikujtuar se liria e tubimit dhe e shprehjes përbëjnë të drejta themelore dhe janë pjesë e vlerave mbi të cilat mbështetet Bashkimi Evropian.
Sipas BE-së, këto të drejta duhet të garantohen dhe të ushtrohen në mënyrë paqësore, pa cenuar sigurinë e qytetarëve dhe pronën publike apo private.
Në të njëjtën kohë, Bashkimi Evropian ka vlerësuar se dialogu konstruktiv ndërmjet të gjitha palëve është rruga për të trajtuar shqetësimet legjitime dhe për të gjetur zgjidhje.
Reagimi vjen në një kohë kur protestat në Shqipëri janë shoqëruar me tensione dhe përplasje, ndërsa kërkesat e protestuesve për çështje që lidhen me arsimin dhe pakënaqësitë ndaj qeverisjes kanë nxitur debat të gjerë publik./Albinfo.ch
