Gjermania po përgatitet të lehtësojë procedurat për njohjen e kualifikimeve të profesionistëve shëndetësorë të diplomuar jashtë Bashkimit Evropian. Ndryshimet synojnë të përshpejtojnë integrimin e tyre në sistemin shëndetësor gjerman dhe të ulin pengesat administrative, transmeton albinfo.ch.
Reforma përfshin mjekët, dentistët, farmacistët dhe mamitë që kanë përfunduar studimet në vende jashtë BE-së, përfshirë edhe profesionistët nga Kosova që synojnë të punojnë në Gjermani.
Sipas ndryshimeve të miratuara nga Bundestagu më 26 mars 2026, provimi i njohurive profesionale do të jetë procedura standarde për mjekët, dentistët dhe farmacistët me diploma nga vende jashtë BE-së. Megjithatë, do të mbetet edhe mundësia e vlerësimit të ekuivalencës së diplomës përmes dokumentacionit.
Një tjetër ndryshim lidhet me digjitalizimin e procedurave, me synimin për të shkurtuar kohën e përpunimit të kërkesave. Gjithashtu, autoritetet do të mund të verifikojnë njohuritë e gjuhës gjermane edhe para përfundimit të vlerësimit të kualifikimeve profesionale.
Për mamitë, reforma parasheh mundësinë e zgjedhjes ndërmjet provimit të njohurive dhe një kursi të përshtatjes profesionale.
Sipas Ministrisë Federale të Shëndetësisë, synimi është lehtësimi i integrimit të profesionistëve të huaj në sistemin shëndetësor, pa cenuar standardet e cilësisë dhe sigurisë së pacientëve.
Ligji pritet të hyjë në fuqi më 1 nëntor 2026, pas përfundimit të procedurave të nevojshme të miratimit nga Bundesrati.
Ndryshimet ligjore janë miratuar edhe nga Bundesrati më 8 maj 2026, ndërsa ligji është shpallur më 22 korrik. Pjesa kryesore e reformës pritet të zbatohet nga 1 nëntori 2026.
Për profesionistët nga Kosova, kjo mund të nënkuptojë një procedurë më të thjeshtë, por njohja e kualifikimit nuk ua garanton automatikisht licencën për të ushtruar profesionin. Aplikuesit duhet të plotësojnë edhe kushtet e tjera, përfshirë njohjen e gjuhës gjermane dhe kërkesat për autorizim profesional./Albinfo.ch
