Majlinda Hasanaj, me prejardhje nga Suhareka, është emëruar këshilltare bashkiake në qytetin e Esslingen-it në Gjermani, duke marrë vendin e lënë vakant pas largimit të Nick Fink nga këshilli, transmeton albinfo.ch.
Hasanaj do të përfaqësojë Partinë Socialdemokrate të Gjermanisë (SPD), ndërsa krahas detyrës së këshilltares, do të ushtrojë edhe funksionin e nënkryetares së dytë të grupit të kësaj partie.
Ajo do të jetë gjithashtu anëtare e Komisionit për Arsimin dhe Kujdesin për Fëmijët (ABEB), ku do të angazhohet në çështje që lidhen me këto fusha në nivel lokal.
Lajmi është bërë i ditur edhe nga faqja e SPD-së në Esslingen, e cila e ka mirëpritur Hasanajn në grupin e këshilltarëve dhe i ka uruar suksese në detyrën e re, transmeton tutje albinfo.ch.
“Jemi shumë të lumtur që mirëpresim një zë të ri në grupin tonë të këshillit, Majlindën, dhe mezi presim të vazhdojmë së bashku punën për politikat vendore të Esslingen-it”, thuhet në njoftimin e partisë.
Në fund të mesazhit, SPD-ja i ka uruar Hasanajt suksese, bashkëpunim të frytshëm dhe vendosmëri në vendimet që e presin në angazhimin e saj të ri./Albinfo.ch
