Kosova është pjesë e Udhërrëfyesit për Inteligjencën Artificiale për gjashtë vendet e Ballkanit Perëndimor, i cili u mirëprit gjatë Samitit të tetë Digjital të Ballkanit Perëndimor, të mbajtur në Herceg Novi të Malit të Zi, përcjell albinfo.ch.
Samiti përfundoi pas dy ditësh diskutimesh mes përfaqësuesve të vendeve të rajonit, institucioneve të Bashkimit Evropian, organizatave ndërkombëtare dhe drejtuesve të industrisë digjitale. Në fokus ishte avancimi i transformimit digjital dhe integrimi më i madh i rajonit në Tregun e Vetëm Digjital të BE-së.
Udhërrëfyesi është hartuar nga Këshilli për Bashkëpunim Rajonal (RCC), në bashkëpunim me partnerët rajonalë. Dokumenti përcakton drejtimin e përbashkët për zhvillimin dhe përdorimin e përgjegjshëm të inteligjencës artificiale, ndërsa miratimi i tij pritet të bëhet në Samitin e ardhshëm të Liderëve të Procesit të Berlinit.
Korniza synon të forcojë gatishmërinë e vendeve të rajonit për inteligjencën artificiale, të përmirësojë qeverisjen dhe inovacionin, si dhe të mbështesë përafrimin me standardet evropiane.
Inteligjenca artificiale ishte një nga temat kryesore të samitit, ku u mbajt edhe paneli “Inteligjenca artificiale: Mundësitë, sfidat dhe perspektivat e së ardhmes”. Diskutimi, i moderuar nga Tanja Maraš, eksperte e lartë për ndërlidhjen digjitale në RCC, mblodhi përfaqësues të Komisionit Evropian, organizatave ndërkombëtare, botës akademike dhe sektorit të teknologjisë.
Pjesëmarrësit diskutuan mënyrat se si vendet e rajonit mund të kalojnë nga planet dhe ambiciet në zbatime konkrete të inteligjencës artificiale, duke nxitur inovacionin dhe rritur konkurrueshmërinë ekonomike.
“Sfida nuk është thjesht të përvetësojmë inteligjencën artificiale, por të sigurojmë që ajo të sjellë vlerë të vërtetë për ekonomitë tona, institucionet publike, bizneset dhe qytetarët, duke ndërtuar njëkohësisht besimin dhe duke siguruar që asnjë pjesë e rajonit të mos mbetet prapa”, deklaroi Maraš.
Në përfundim të samitit u përcaktuan edhe disa prioritete për përshpejtimin e integrimit digjital, përfshirë njohjen e ndërsjellë të identiteteve digjitale, zbatimin e portofolave të identitetit digjital, shërbimet më të përballueshme të roaming-ut me BE-në, forcimin e bashkëpunimit në sigurinë kibernetike dhe përmirësimin e ndërlidhjes digjitale.
RCC-ja pritet të mbështesë më tej zbatimin e Udhërrëfyesit për Inteligjencën Artificiale dhe koordinimin rajonal në fushën e shërbimeve digjitale.
Gjatë samitit u diskutuan gjithashtu shërbimet publike digjitale, aftësitë digjitale, mbrojtja e fëmijëve në internet, bizneset e reja dhe inovacioni, me theks te zgjidhjet praktike që mund të përmirësojnë shërbimet dhe jetën e përditshme të qytetarëve dhe bizneseve.
Samiti u organizua nga Ministria e Administratës Publike e Malit të Zi, nën kujdesin e qeverisë së këtij vendi, në partneritet me RCC-në, Bashkimin Evropian dhe partnerë të tjerë rajonalë e ndërkombëtarë, në kuadër të kryesimit malazez të Procesit të Berlinit për vitin 2026./Albinfo.ch
