Drejtori i Departamentit për Sigurinë Publike në Shqipëri, Dhimitraq Ziu, ka bërë të ditur se 127 persona janë arrestuar dhe 244 të tjerë janë proceduar penalisht në Tiranë, në lidhje me protestat e dhunshme të ditëve të fundit.
Ziu ka njoftuar se janë lënduar 120 punonjës policie në disa qytete të vendit teksa tha se strukturat e Krimit Kibernetik dhe Antiterrorit po hetojnë kanale dhe grupe në rrjetet sociale, ku janë shpërndarë mesazhe me thirrje për akte ekstreme e terroriste dhe kërcënime ndaj punonjësve të Policisë.
“Deri në këto momente në Tiranë, janë arrestuar 127 shtetas dhe janë proceduar në gjendje të lirë 244 shtetas, për ushtrim të dhunës ndaj punonjësve të Policisë, dëmtim të institucioneve shtetërore, shkatërrim të pronës publike dhe private, si dhe të bankomateve, kamerave, automjeteve dhe rrethimeve metalike”, ka thënë ai, transmeton albinfo.ch.
Ai ka thënë se në Durrës janë arrestuar 23 persona dhe janë proceduar penalisht 12 të tjerë, në Korçë janë arrestuar 2 persona dhe janë proceduar në gjendje të lirë 23 persona, në Vlorë janë proceduar në gjendje të lirë 20 persona, në Shkodër janë proceduar në gjendje të lirë 9 persona.
Gjatë protestës në Shkodër, ai tha se është plagosur rëndë një oficer i Policisë së Rendit, i cili aktualisht ndodhet në Spitalin e Traumës Tiranë, për ndihmë mjekësore teksa njoftoi se autori i plagosjes është identifikuar, por për shkak të moshës nuk është arrestuar.
Në Elbasan janë proceduar në gjendje të lirë 6 persona dhe në Kukës janë proceduar në gjendje të lirë 10 persona.
Sa i përket rasteve të dyshuara për akte ekstreme, Ziu ka theksuar po bashkëpunojnë me agjencitë partnere ndërkombëtare për zbulimin e adresave IP, identifikimin e administratorëve të këtyre kanaleve dhe të çdo përdoruesi që bën thirrje për dhunë dhe akte terroriste.
“Përveç ngjarjeve në terren, strukturat e specializuara të Hetimit të Krimit Kibernetik dhe Antiterrorit kanë marrë në shqyrtim të menjëhershëm hapësirën virtuale, ku gjatë monitorimeve intensive, janë identifikuar disa kanale dhe grupe komunikimi, nëpërmjet të cilave janë shpërndarë mesazhe me përmbajtje të drejtpërdrejtë kriminale, ndër to, thirrje për kryerje të akteve ekstreme dhe terroriste, si dhe kërcënime direkte kundër jetës së punonjësve të Policisë së Shtetit”, potencoi ai.
