Abrashi premton marrëveshje me Zvicrën për pensionet

Sipas tij, Zvicra i ka ndalur njëanshëm pensionet për kosovarët pas keqpërdorimeve që janë bërë nga një numër i përfituesve

Autoritetet e Kosovës janë shumë optimist se do ta gjejnë një zgjidhje me autoritetet zvicerane për qytetarët e Kosovës që kanë punuar në shtetin e Zvicrës, por që kanë probleme me marrjen e pensioneve. Gjatë këtij muaji pritet që një delegacion nga Zvicra ta vizitojë Kosovën për këtë çështje.

Kështu ka deklaruar ministri i Punës dhe Mirëqenies Sociale, Arban Abrashi për gazetën “Zëri”. Ai ka thënë se Zvicra njëanshëm e ka ndërprerë marrëveshjen në vitin 2010 në bazë të argumenteve, të cilat shteti helvetik i ka pasur.

“Mbas pesë vjet heshtjeje në këtë punë, ne si kabinet kemi marrë hapat e parë, kemi kontaktuar Ambasadën e Zvicrës, të cilët kanë hapur rrugë për këtë marrëveshje. Kanë  dërguar pyetësorin e dytë në mars, një pyetësor me dhjetëra pyetjesh, edhe shumë gjithëpërfshirëse për sistemin e përgjithshëm pensional në Kosovë, atë pyetësor e kemi kthyer gjatë prillit”, deklaroi Abrashi.

Ministri kosovar i Punës po ashtu tha se hapi tjetër i Prishtinës ka qenë një marrëveshje si garantuese për shtetin e Zvicrës.

“Pra, gjatë këtij muaji po presim një ekip ekspertësh nga Zvicra. Ne jemi përgatitur në atë nivel dhe kemi angazhuar ekspertë të Bankës Botërore, të cilët do të jenë në anën tonë dhe do t’i bëjmë negociatat ashtu qysh iu takojnë dy shteteve”, deklaroi mes tjerash ministri Abrashi .

Sipas tij, Zvicra i ka ndalur njëanshëm pensionet për kosovarët pas keqpërdorimeve që janë bërë nga një numër i përfituesve, qoftë për pensionet invalidore, qoftë për ata persona që kanë vdekur.