Tetë kompani nga Kosova po përfaqësojnë vendin në panairin ndërkombëtar të industrisë ushqimore dhe të pijeve “SIAL Paris 2026”, i cili po zhvillohet nga 17 deri më 21 tetor në Paris të Francës.
Sipas Ministrisë së Industrisë, Ndërmarrësisë, Tregtisë dhe Inovacionit (MINTI), kompanitë Abi Progres, Eurofood, Camel, Royal Beverage, BBF Company, Frutti, Vitafood dhe Agro-Florentina po prezantojnë produktet e tyre para blerësve, distributorëve dhe partnerëve të mundshëm nga tregjet ndërkombëtare.
Pjesëmarrja në këtë panair është mundësuar nga MINTI, përmes Agjencisë për Investime dhe Përkrahjen e Ndërmarrjeve në Kosovë (KIESA). Kjo nismë synon promovimin e prodhimeve vendore, krijimin e partneriteteve të reja afariste dhe rritjen e potencialit eksportues të bizneseve kosovare.
Në mesin e produkteve që po ekspozohen janë ajvari, turshitë, trangujt e konservuar, keçapi, majoneza, marmelatat, biskotat, vaferat, shtrudlet, krem-bananet, flipsat, produktet e drithërave, produktet proteinike dhe suplementet ushqimore.
Po ashtu, vizitorët e panairit kanë mundësi të njihen me një gamë të gjerë pijesh dhe produktesh të tjera, si lëngjet e frutave, pijet energjike, uji, çaji i ftohtë, produktet organike, kërpudhat e egra dhe ato të kultivuara, frutat e malit, si dhe bimët mjekësore dhe aromatike.
Përfaqësimi i Kosovës në këtë ngjarje ndërkombëtare bëhet përmes një stende kombëtare me sipërfaqe prej 85 metrash katrorë, e vendosur në korridorin kryesor të sallës 4, me numër M105.
Stendën e Kosovës e ka vizituar edhe ambasadori i Republikës së Kosovës në Francë, Lulzim Hiseni, së bashku me bashkëpunëtorët e tij. Gjatë vizitës, ai është njohur nga afër me produktet dhe kapacitetet prodhuese të kompanive pjesëmarrëse, ndërsa ka shprehur gatishmërinë për të shqyrtuar mundësitë e bashkëpunimit me institucionet dhe akterët përkatës në Francë.
Qëllimi i këtyre përpjekjeve është promovimi i produkteve kosovare dhe lehtësimi i depërtimit të tyre në tregun francez.
“SIAL Paris” konsiderohet një ndër ngjarjet kryesore ndërkombëtare të industrisë ushqimore, duke mbledhur prodhues, blerës, distributorë dhe profesionistë të sektorit nga vende të ndryshme të botës.
Sipas MINTI-t, pjesëmarrja në këtë panair pritet të ndihmojë në rritjen e njohjes së produkteve vendore në tregjet e huaja, forcimin e konkurrueshmërisë së kompanive kosovare dhe zhvillimin e mëtejshëm të sektorit të prodhimit dhe eksportit në Kosovë.
Panairi ndërkombëtar “SIAL Paris 2026” do të vazhdojë deri më 21 tetor 2026.
