Mes 3.010 filmave aplikues nga e gjithë bota, dokumentari “SARA” është përzgjedhur për konkurrencën ndërkombëtare të Kuçova International Independent Film Festival (KIIFF), ku është nderuar me çmimin “Special Mention of the Jury”. Ky vlerësim shënon një tjetër sukses për ekipin e filmit dhe organizatën “Art Without Limit”, transmeton albinfo.ch.
Dokumentari “SARA” ka marrë një vlerësim të veçantë nga juria profesionale e Festivalit Ndërkombëtar të Filmit të Pavarur në Kuçovë, duke u dalluar mes mijëra aplikimeve nga vende të ndryshme të botës.
Çmimi “Special Mention of the Jury” u jepet filmave që tërheqin vëmendjen e jurisë përmes qasjes së tyre artistike dhe përmbajtjes, ndërsa për ekipin e “SARËS” ky sukses përbën një tjetër arritje në rrugëtimin e filmit.
Lajmi është bërë i ditur nga ekipi i filmit përmes një njoftimi, ku është shprehur kënaqësia për këtë vlerësim dhe për mundësinë që vepra të prezantohet në një konkurrencë ndërkombëtare.
Ky rezultat vjen si një tjetër dëshmi e përpjekjeve të ekipit për të sjellë histori që prekin publikun dhe për të promovuar krijimtarinë filmike përtej kufijve.
Përmes projekteve të tilla, “Art Without Limit” vazhdon të sjellë në vëmendje rrëfime me dimension njerëzor dhe artistik, duke synuar që ato të gjejnë jehonë te publiku dhe në festivale ndërkombëtare./Albinfo.ch
