Një shtetas shqiptar 36-vjeçar është dënuar në Gjermani për një seri vjedhjesh në banesa private, të kryera në periudhën nga nëntori i vitit 2024 deri në janar të vitit 2026, në Schriesheim, Weinheim dhe Mannheim, transmeton albinfo.ch.
Sipas raportimeve të mediave gjermane, ai kishte shënjestruar kryesisht shtëpi private, prej të cilave kishte marrë para të gatshme dhe stoli ari, me vlerë prej dhjetëra mijëra eurosh në total.
Arrestimi i tij ndodhi më 22 janar 2026, pasi një banore e kishte vërejtur gjatë një vjedhjeje dhe kishte njoftuar policinë. Pak më vonë, ai u gjet i fshehur në shkurre, ku policia zbuloi edhe një pjesë të konsiderueshme të parave dhe stolive të vjedhura.
Gjatë hetimeve, autoritetet analizuan gjurmët e ADN-së dhe ato të këpucëve të gjetura në disa prej banesave. Para gjykatës, 36-vjeçari pranoi gjashtë nga dhjetë rastet për të cilat akuzohej, ndërsa katër të tjerat i mohoi.
Me vendimin e publikuar më 19 tetor, gjykata e shpalli fajtor për pesë vjedhje të rënda dhe një tentativë vjedhjeje. Për katër rastet e tjera, ai u shpall i pafajshëm, pasi provat nuk ishin të mjaftueshme për të vërtetuar fajësinë.
Gjatë arsyetimit të vendimit, gjyqtari mori parasysh përsëritjen e veprave penale, si dhe pasojat psikologjike që hyrjet e paligjshme në banesa u kishin shkaktuar disa prej viktimave. /Albinfo.ch
