Shqipëria po zgjeron angazhimin e saj në misionin paqeruajtës të NATO-s në Kosovë, KFOR, duke dërguar për herë të parë një kontingjent të Forcës Ajrore, të përbërë nga 13 efektivë, transmeton albinfo.ch.
Ceremonia e përcjelljes u mbajt në Bazën Ajrore të Farkës, në prani të përfaqësuesve të lartë ushtarakë dhe familjarëve të pjesëtarëve që do të shërbejnë në këtë mision, me bazë në kampin amerikan “Bondsteel”.
Ministri shqiptar i Mbrojtjes, Ermal Nufi, e cilësoi këtë angazhim si një hap të rëndësishëm për rritjen e kapaciteteve të Forcës Ajrore dhe përmbushjen e detyrimeve të Shqipërisë si anëtare e NATO-s.
Ai theksoi se siguria dhe stabiliteti i Kosovës kanë rëndësi të drejtpërdrejtë për paqen në Shqipëri dhe në të gjithë rajonin, duke rikonfirmuar përkushtimin e vendit për vazhdimin e kontributit në kuadër të KFOR-it.
Shqipëria merr pjesë edhe në misione të tjera ndërkombëtare nën drejtimin e NATO-s, Bashkimit Evropian dhe Kombeve të Bashkuara. /Albinfo.ch
