Ish-presidenti amerikan Bill Clinton dhe bashkëshortja e tij, Hillary Clinton, kanë nderuar kujtimin e Osman Osmanit, njërit prej themeluesve të lobit shqiptar në Shtetet e Bashkuara, duke e cilësuar atë si një mik dhe fqinj të jashtëzakonshëm, përcjell albinfo.ch.
Në një letër ngushëllimi drejtuar familjes së tij, çifti Clinton kujton takimin e parë me Osmanin në vitin 1999, në Chappaqua të Nju Jorkut. Asokohe, ai i kishte prezantuar me një familje refugjatësh nga Kosova, të cilën e kishte strehuar në shtëpinë e tij.
Clintonët kanë vlerësuar bujarinë, mikpritjen, miqësinë dhe humorin e Osmanit, duke shprehur ngushëllime për fëmijët, familjarët dhe të gjithë ata që e njohën.
Vetë Osmani kishte rrëfyer për këtë miqësi në një intervistë për podcastin PIKË, më 22 qershor 2025. Ai tregoi se si ishte bërë fqinj me ish-presidentin amerikan dhe se si Clinton kishte ardhur personalisht për ta takuar pasi kishte blerë një shtëpi në afërsi të tij.
Takimi kishte mbetur i veçantë për Osmanin edhe për shkak të bisedës rreth Kosovës dhe rolit të Clintonit gjatë luftës, kur ndërhyrja e NATO-s ndihmoi në përfundimin e fushatës së forcave serbe kundër popullsisë shqiptare./Albinfo.ch
