Komunitetet e diasporës në të gjithë Ballkanin Perëndimor përfaqësojnë një burim të rëndësishëm për zhvillimin ekonomik, jo vetëm përmes kapitalit financiar, por edhe përmes njohurive në biznes, rrjeteve profesionale dhe lidhjeve me tregjet ndërkombëtare, transmeton albinfo.ch.
Për të forcuar këtë potencial, GIZ dhe Albanian Global Business Network kanë nënshkruar një memorandum mirëkuptimi në Prishtinë, me qëllim rritjen e bashkëpunimit ndërmjet investitorëve të diasporës dhe bizneseve me perspektivë zhvillimi në rajon.
Përmes iniciativës “Linking Diaspora and Founders”, bashkëpunimi synon të ndihmojë startup-et dhe ndërmarrjet e vogla e të mesme që të përgatiten për të pranuar investime, të krijojë lidhje me investitorë potencialë dhe të adresojë pengesat e rreziqet që mund të vështirësojnë realizimin e investimeve.
Nisma synon të ndërthurë përvojën dhe ekspertizën e diasporës me potencialin sipërmarrës në vendet e Ballkanit Perëndimor, duke kontribuar në krijimin e një mjedisi më të lidhur dhe më të qëndrueshëm për investime.
Përmes këtij bashkëpunimi, synohet që diaspora të ketë një rol edhe më të madh në zhvillimin e bizneseve vendore, krijimin e mundësive të reja ekonomike dhe forcimin e lidhjeve mes sipërmarrësve të rajonit dhe tregjeve ndërkombëtare./Albinfo.ch
