Mbi 50 nxënës shqiptarë nga landi i Nordrhein-Westfalenit (NRW) në Gjermani kanë nisur një udhëtim njëjavor në trojet shqiptare, me qëllim njohjen më të afërt me historinë, kulturën dhe traditat e vendit të prejardhjes së tyre, transmeton albinfo.ch.
Lajmi është bërë i ditur nga Konsullata e Përgjithshme e Republikës së Kosovës në Düsseldorf, e cila thekson rëndësinë e kësaj nisme për ruajtjen e lidhjeve të të rinjve të diasporës me atdheun.
Përmes këtij ekskursioni kulturor, nxënësit kanë mundësi të vizitojnë vende me rëndësi historike e kulturore, të njihen me trashëgiminë kombëtare dhe të krijojnë përvoja të përbashkëta me bashkëmoshatarët e tyre.
Nisma realizohet falë bashkëpunimit të KASH-it, mësuesve, prindërve, nxënësve dhe Konsullatës së Përgjithshme të Kosovës në Düsseldorf, me mbështetjen financiare të prindërve dhe Ministrisë së Punëve të Jashtme dhe Diasporës.
Organizatorët u kanë uruar nxënësve udhëtim të mbarë, përvoja të vlefshme dhe kujtime të bukura nga vizita në trojet shqiptare./Albinfo.ch
