Zvicra ofron ndihma për kampet e refugjatëve në Jordani

Në kampin Azraq në Jordani jetojnë rreth 24 mijë refugjatë sirianë ndërsa numri i të strehuarve në gjithë Jordani është rreth 600 mijë

Keystone

Zvicra është zotuar që Jordanisë t`i ofrojë ndihma të shtuara për strehimin e refugjatëve nga vendi i saj fqinj, Siria. Ministri zviceran i punëve të jashtme, Didier Burkhalter me rastin e vizitës që i ka bërë sot kampit të refugjatëve sirianë Azraq në Jordani i ka siguruar autoritetet e atjeshme se Zvicra do të bëjë përmirësimin e sistemit të ujit të pijshëm në kamp. Në këtë drejtim zviceranët janë duke bashkëpunuar  ngushtësisht me Unicef-in (Organizatën e OKB-së për fëmijë).

Në këtë kamp jetojnë rreth 24 mijë refugjatë sirianë ndërsa numri i të strehuarve në gjithë Jordani është rreth 600 mijë.

Zvicra pak kohë më parë, ndihmës prej 200 milionë frangave destinuar refugjatëve të Sirisë ia ka shtuar edhe 70 milionë tjera. Ajo përmes DEZA-s ka punuar në ngritjen e një shkolle dhe përmirësimin e infrastrukturës në këtë kamp.

Pa përmirësimin e kushteve të jetesës në këto kampe gjithmonë ekziston rreziku për ikjen e banuesve të tyre drejt Evropës, shkruan në një komunikatë Departamenti Federal për Punë të Jashtme (EDA).