Disa persona janë lënduar pasi një veturë e tipit BMW u përplas qëllimisht me një grup njerëzish pak para mesnatës së së hënës në qytetin Neustadt am Rübenberge, në landin e Saksonisë së Poshtme në Gjermani. Policia ka konfirmuar se rasti ndodhi pranë Hanoverit, ndërsa personat e përfshirë dyshohet se njiheshin mes vete, përcjell albinfo.ch.
Sipas një zëdhënësi të policisë lokale, nga katër deri në pesë persona pësuan lëndime të shkallëve të ndryshme, nga të lehta deri në serioze. Megjithatë, sipas informacioneve fillestare, jeta e asnjërit prej të lënduarve nuk është në rrezik.
Ngjarja u ndërpre pas ndërhyrjes së një patrulle policore që ndodhej në afërsi duke kryer një kontroll rutinë të trafikut. Gjatë incidentit, policët qëlluan në drejtim të automjetit, bëri të ditur zëdhënësi.
Ndërkohë, personat që ndodheshin në BMW janë larguar nga vendi i ngjarjes dhe vazhdojnë të jenë të lirë. Policia po punon për sqarimin e plotë të rrethanave dhe identifikimin e personave të përfshirë.
Neustadt am Rübenberge ndodhet në veri të Gjermanisë, në rajonin e Hanoverit, mes qyteteve Hanover dhe Bremen. /Albinfo.ch
