Raporti për vrasjen e Arlinda Zekajt ka evidentuar shkelje dhe mangësi serioze në trajtimin e rastit nga Gjykata, Prokuroria dhe Qendra për Punë Sociale në Pejë. Këto gjetje janë bërë publike nga ministrja e Drejtësisë, Donika Gërvalla, e cila ka prezantuar detaje të reja mbi paralajmërimet e viktimës dhe veprimet e institucioneve para vrasjes së saj, përcjell albinfo.ch.
Sipas ministres, më 20 tetor, vetëm pesë ditë para vrasjes, Arlinda Zekaj i kishte shkruar sërish kryetarit të Gjykatës, duke shprehur zhgënjimin për mënyrën se si po trajtohej rasti dhe duke paralajmëruar se mund të vritej për shkak të neglizhencës institucionale.
Gërvalla ka bërë të ditur se vendimet gjyqësore për kthimin e Zekajt në shtëpinë e saj nuk ishin zbatuar. Më 20 dhe 21 tetor, Qendra për Punë Sociale kishte njoftuar zyrtarisht gjyqtarin Migjen Kastrati për moszbatimin e urdhrit mbrojtës, por sipas dokumentacionit të shqyrtuar, nuk rezulton se ai kishte ndërmarrë veprime të mëtejshme ligjore.
Ministrja ka ngritur gjithashtu shqetësime për veprimet e Prokurorisë Themelore në Pejë. Sipas saj, kjo prokurori ishte informuar për dhunën dhe kërcënimet ndaj Zekajt që nga 10 korriku, ndërsa më 23 tetor, vetëm dy ditë para vrasjes, edhe kryeprokurorja e atëhershme, Lumturie Vuçetaj, ishte njoftuar me shkrim për një kërcënim të drejtpërdrejtë me vrasje ndaj saj.
Sipas dokumentacionit të prezantuar nga Gërvalla, prokurorja përgjegjëse kishte refuzuar hapjen e një rasti për kanosje dhe kishte kërkuar nga personat e dyshuar sigurimin e pamjeve të kamerave të sigurisë. Megjithatë, ministrja ka thënë se nuk ka dokumentacion që dëshmon nëse këto pamje janë dorëzuar dhe çfarë veprimesh janë ndërmarrë më pas.
Dy ditë pas këtij njoftimi, më 25 tetor, Albert Sylaj dyshohet se e vrau Arlinda Zekajn me sëpatë.
Gërvalla ka theksuar se në vend që të mundësohej largimi i dhunuesit nga shtëpia, viktimës i ishte rekomanduar disa herë të largohej për arsye sigurie, ndërsa çështjen e pronësisë ta zgjidhte përmes një kontesti civil.
“Pra, që të jemi të qartë: në vend që të largohej dhunuesi, viktimës i kërkohej të largohej nga rreziku, duke hequr dorë nga shtëpia e saj”, ka deklaruar ministrja.
Mangësi edhe në Qendrën për Punë Sociale
Raporti evidenton probleme edhe në punën e Qendrës për Punë Sociale në Pejë, e cila kishte pasur komunikim të vazhdueshëm me Arlinda Zekajn nga korriku deri në tetor.
Sipas Gërvallës, kjo qendër nuk e kishte konsideruar si përgjegjësi të saj krijimin e kushteve për kthimin e viktimës në shtëpinë e përbashkët. Po ashtu, nuk kishte dorëzuar me kohë raportin e kërkuar nga Gjykata.
Më 5 tetor, përfaqësuesi i Qendrës kishte munguar në seancë, ndërsa mungesa e raportit kishte kontribuar në shtyrjen e mëtejshme të saj. Sipas ministres, përfaqësuesi i Zyrës për Mbrojtje dhe Ndihmë të Viktimave kishte kërkuar çdo ditë dorëzimin e raportit nga zyrtari përgjegjës, Durim Kelmendi, por pa rezultat.
Një pjesë e raportit trajton edhe situatën e fëmijës së mitur. Gërvalla ka thënë se vlerësimi psikologjik klinik përmban të dhëna që nuk përputhen me paraqitjen publike se fëmija nuk dëshironte të qëndronte me nënën. Ajo nuk ka dhënë detaje të tjera, duke iu referuar mbrojtjes së privatësisë dhe interesit më të mirë të fëmijës.
Kërkohen sqarime edhe nga Komuna e Pejës
Ministrja ka ngritur pikëpyetje edhe për përgjegjësinë mbikëqyrëse të Komunës së Pejës ndaj Qendrës për Punë Sociale.
Sipas saj, deri në përfundimin e raportit, komuna kishte dërguar vetëm një përgjigje prej shtatë rreshtash, ku konfirmohej se rasti ishte diskutuar në mekanizmin koordinues komunal. Megjithatë, nuk ishin dhënë informacione për masa konkrete lidhur me mangësitë e evidentuara apo për veprimet e planifikuara.
Për këtë arsye, Gërvalla ka kërkuar sqarime edhe nga kryetari i Komunës së Pejës, Gazmend Muhaxhiri.
Ndërkohë, dy prokurore të përfshira në trajtimin e rastit janë suspenduar nga detyra. Gërvalla ka theksuar se suspendimi nuk nënkupton konstatim përfundimtar të përgjegjësisë, por krijon mundësinë që procedurat për shqyrtimin e veprimeve dhe mosveprimeve të tyre të zhvillohen pa pengesa.
Ajo ka kërkuar që të gjitha institucionet përgjegjëse të japin sqarimet e nevojshme dhe që, aty ku konstatohen shkelje, të ndërmerren masat e parapara me ligj. /Albinfo.ch
