Kosova U21 mund të përforcohet me një tjetër futbollist të talentuar nga futbolli zviceran. Bëhet fjalë për Demir Xhemalijan, mesfushorin e FC Luzernit, i cili ka qenë pjesë e përfaqësueseve të Zvicrës në grupmoshat e reja, transmeton albinfo.ch.
Sipas informacioneve të bëra publike, Xhemalija ka zhvilluar ditë më parë një kontakt me përzgjedhësin e Kosovës U21, Hekuran Kryeziu, të cilit i ka dhënë përgjigje pozitive mundësisë për ta përfaqësuar Kosovën.
Interesimi për mesfushorin shihet si një mundësi për të shtuar cilësinë në repartin e mesfushës së përfaqësueses së re, duke marrë parasysh formimin e tij në futbollin zviceran dhe përvojën në grupmoshat e këtij shteti.
Megjithatë, mbetet të shihet nëse kontaktet do të konkretizohen me vendimin përfundimtar të futbollistit dhe përfshirjen e tij në planet e Kombëtares U21.
Një angazhim i tillë do të ishte një tjetër përforcim për Kosovën nga talentet me prejardhje kosovare që janë formuar në akademitë dhe klubet e futbollit evropian./Albinfo.ch
