Protesta janë mbajtur të premten në Pejë dhe Mitrovicë, ndërsa thirrjet për drejtësi pas vrasjes së Arlinda Zekajt pritet të vazhdojnë edhe në Prishtinë, ku protesta është paralajmëruar për orën 16:00, transmeton albinfo.ch.
Në Pejë, marshimi ka nisur nga objekti i komunës dhe ka vazhduar te Qendra për Punë Sociale, Stacioni Policor, Gjykata dhe Prokuroria.
Në protestë kanë marrë pjesë edhe familjarë të Arlinda Zekajt. Para Prokurorisë, protestuesit kanë hedhur vezë dhe mjete tymuese, ndërsa kanë brohoritur: “Edhe sa gra të vrara?”.
Njëra nga organizatoret ka deklaruar se institucionet kanë dështuar ta mbrojnë jetën e Arlindës.
“Ne sot si qytetarë e bashkëqytetarë të Arlindës kemi ardhur te secili institucion për të kërkuar drejtësi”, është shprehur ajo.
Edhe në Mitrovicë, qytetarët janë mbledhur për të kërkuar drejtësi. Protesta ka nisur në sheshin e qytetit dhe ka vazhduar para Stacionit Policor dhe Gjykatës Themelore. Protestuesit janë ndalur edhe para Qendrës për Punë Sociale, ku në objekt është shkruar mesazhi: “Shteti i ka duart me gjak”.
Në mesin e pankartave ishte edhe mesazhi: “Gjumi s’ka me ju marrë, flaka ka me ju dalë”.
Arlinda Zekaj, 49-vjeçare, u vra më 25 tetor në Vitomiricë të Pejës. Për vrasjen dyshohet ish-kunati i saj, Albert Sylaj, i cili është arrestuar dhe ndodhet në paraburgim.
Rasti ka ngritur shqetësime të mëdha për mënyrën se si institucionet e trajtuan rrezikun ndaj viktimës. Ditën e vrasjes, ish-bashkëshorti i saj, Jeton Sylaj, ishte ndaluar nga organet e rendit, pasi Zekaj e kishte denoncuar për mosrespektim të urdhrit mbrojtës.
Po ashtu, vetëm tri ditë para se të vritej, Arlinda Zekaj i kishte dërguar një letër kryeprokurores së Pejës, duke paralajmëruar se jeta e saj ishte në rrezik.
Ndërkohë, protestë në Prishtinë është paralajmëruar për orën 16:00, në vazhdën e reagimeve qytetare që kërkojnë drejtësi dhe përgjegjësi institucionale për vrasjen e saj./Albinfo.ch
