Një shtetas kosovar, i kërkuar me urdhërarrest ndërkombëtar të lëshuar nga autoritetet e Luksemburgut për veprën penale “Vjedhje”, është arrestuar në Kosovë, transmeton albinfo.ch.
Sipas njoftimit të Policisë së Kosovës, arrestimi është realizuar më 30 tetor 2026, rreth orës 16:30, nga njësitet e Drejtorisë për Bashkëpunim Ndërkombëtar Policor, në koordinim me njësitet e tjera policore dhe institucionet përkatëse.
I arrestuari, me inicialet D.A., kërkohej përmes INTERPOL-it, pasi ndaj tij autoritetet e Luksemburgut kishin lëshuar urdhërarrest ndërkombëtar për veprën penale “Vjedhje”, të paraparë në Kodin Penal të këtij shteti.
Me urdhër të prokurorit kujdestar, i dyshuari është dërguar në ndalim policor për 48 orë, ndërsa procedurat e mëtejshme ligjore do të vazhdojnë sipas kompetencave të institucioneve përkatëse.
Policia e Kosovës ka bërë të ditur se do të vazhdojë bashkëpunimin dhe shkëmbimin e informacioneve me institucionet vendore, shtetet dhe organizatat ndërkombëtare, me qëllim të parandalimit dhe hetimit të aktiviteteve kriminale, si dhe lokalizimit dhe arrestimit të personave të kërkuar./Albinfo.ch
