Franca ka mobilizuar 70 mijë pjesëtarë të forcave të sigurisë për të garantuar rendin publik gjatë demonstratave të paralajmëruara për të shtunën, më 31 tetor, transmeton albinfo.ch.
Ministri i Brendshëm francez, Laurent Nuñez, deklaroi se kjo ditë paraqet “rrezik shumë të lartë” për sigurinë publike, pasi disa grupe radikale kanë bërë thirrje në rrjetet sociale për tubime dhe protesta të mundshme të dhunshme.
Sipas tij, rreziku për incidente pritet të jetë veçanërisht i lartë gjatë mbrëmjes, pasi të kenë përfunduar demonstratat kryesore. Ai paralajmëroi se reagimi i forcave të sigurisë ndaj akteve të dhunës do të jetë “jashtëzakonisht i rreptë”.
“Po shohim shumë thirrje për tubime nga lëvizja punëtore, e majta ekstreme e radikalizuar dhe disa faqe të radikalizuara të ‘Jelekverdhëve’. Ato u bëjnë thirrje njerëzve të marrin pjesë në tubime në hapësirat publike nga ora 20:00 e së shtunës, më 31 tetor, në shumë qytete të Francës. Këto thirrje shoqërohen me mesazhe mjaft radikale”, deklaroi Nuñez.
Ai shtoi se përputhja e datës me festën e Halloween-it kërkon vëmendje të shtuar nga autoritetet, veçanërisht gjatë orëve të mbrëmjes.
Ndërkohë, Ministria e Brendshme bëri të ditur se 410 mijë persona morën pjesë në marshimet e së shtunës së kaluar. Edhe atëherë ishin angazhuar 70 mijë pjesëtarë të forcave të sigurisë, me qëllim parandalimin e përsëritjes së plaçkitjeve dhe akteve të vandalizmit të regjistruara në disa qytete më 17 tetor./Albinfo.ch
