Më 31 tetor, në shumë vende të botës festohet Halloween, e njohur te ne edhe si “Nata e Shtrigave”. Por, përtej kostumeve të frikshme, maskave dhe dekorimeve me kunguj, kjo festë ka një histori të gjatë dhe tradita që datojnë mijëra vjet më parë, përcjell albinfo.ch.
Origjina e Halloween-it lidhet me festivalin e lashtë kelt Samhain, i cili shënonte fundin e verës dhe të sezonit të korrjeve, si dhe fillimin e dimrit. Keltët besonin se në këtë natë kufiri mes botës së të gjallëve dhe asaj të të vdekurve bëhej më i hollë, duke u mundësuar shpirtrave të ktheheshin mes njerëzve.
Sipas besimeve të asaj kohe, shpirtrat mund të shkaktonin trazira ose të sillnin fat të keq. Për t’i larguar, njerëzit ndiznin zjarre dhe vishnin kostume e maska, me shpresën se do të fshiheshin prej tyre ose do t’i trembnin.
Një tjetër traditë e lidhur me këtë periudhë ishte vendosja e ushqimeve dhe ëmbëlsirave si ofertë për shpirtrat. Kjo praktikë shihet si një nga pararendëset e zakonit të sotëm “trick-or-treat”, kur fëmijët shkojnë shtëpi më shtëpi të veshur me kostume dhe kërkojnë ëmbëlsira.
Nga Samhain te Halloween-i modern
Me përhapjen e krishterimit, traditat e kësaj periudhe u ndërthurën me festat e kalendarit të krishterë. Dita e 1 nëntorit u përcaktua si Dita e të Gjithë Shenjtorëve (All Saints’ Day), ndërsa mbrëmja para saj u njoh si All Hallows’ Eve, prej nga rrjedh emri Halloween.
Festa mori një përhapje të madhe në Shtetet e Bashkuara në shekullin XIX, veçanërisht pas ardhjes së emigrantëve irlandezë, të cilët sollën me vete traditat e tyre. Me kalimin e kohës, Halloween pësoi ndryshime dhe u shndërrua në një festë të karakterizuar nga kostumet, dekorimet, aktivitetet argëtuese dhe mbledhjet mes miqsh e familjarësh.
Sot, Halloween festohet në shumë vende të botës, ndonëse mënyra e kremtimit ndryshon nga një kulturë në tjetrën. Pavarësisht transformimeve ndër shekuj, lidhja me simbolikën e frikës, misterit dhe botës së mbinatyrshme mbetet një nga elementet më të njohura të kësaj feste./Albinfo.ch
