Raportohet se një shtetas i Kosovës, i cili jeton në Zvicër që nga viti 1993 dhe ka krijuar familje me katër fëmijë, është dënuar nga Gjykata Penale e Luzernit me 15 muaj burgim me kusht dhe dëbim pesëvjeçar nga vendi. Ai është shpallur fajtor për mashtrim të përsëritur, falsifikim dokumentesh dhe përfitim të padrejtë të ndihmave sociale, ndërsa mbrojtja ka paralajmëruar ankesë ndaj vendimit, i cili ende nuk është i formës së prerë, shkruan zentralplus.ch, përcjell albinfo.ch.
Sipas raportimit të mediumit zviceran Zentralplus, familja e tij kishte përfituar ndihma sociale me ndërprerje që nga viti 2011. Megjithatë, nga viti 2017, burri kishte filluar të mos i deklaronte të gjitha të ardhurat dhe pasuritë pranë autoriteteve sociale të qytetit të Luzernit.
Në mesin e të ardhurave të padeklaruara ishin paga e bashkëshortes, dy llogari bankare, si dhe të ardhurat nga praktika profesionale dhe bursat e djalit të tij.
Një nga rastet më të rëndësishme ishte pagesa retroaktive prej rreth 160 mijë frangash nga Sigurimi Invalidor (IV), të cilën ai e kishte marrë në gusht të vitit 2020 për periudhën 2012–2017. Meqenëse familja kishte përfituar ndihma sociale gjatë asaj kohe, ai ishte i detyruar ta njoftonte zyrën për këtë shumë.
Por, sipas vendimit gjyqësor, brenda vetëm tri ditësh ai kishte tërhequr 156 500 franga në para të gatshme. Kur autoritetet i kishin kërkuar dëshmi për lëvizjet bankare, ai kishte dorëzuar një ekstrakt të përmbledhur, në të cilin nuk figuronin as pagesa e pranuar dhe as tërheqjet e parave.
Në total, gjykata ka konstatuar se familja kishte përfituar padrejtësisht rreth 46 mijë franga ndihma sociale gjatë periudhës 2017–2022. Këtë shumë autoritetet sociale kërkojnë ta rikthejnë, përcjell tutje albinfo.ch.
33 vjet qëndrim nuk mjaftuan për të shmangur dëbimin
Përveç dënimit me 15 muaj burgim me kusht, gjykata ka vendosur edhe dëbimin e tij nga Zvicra për pesë vjet, duke përfshirë ndalimin e hyrjes në të gjithë zonën Schengen, shkruan prometheus1.ch.
Në shqyrtimin e rastit, gjykata ka vlerësuar edhe lidhjet e tij me Zvicrën. Megjithëse jeton në vend që nga viti 1993, ka katër fëmijë dhe përvojë pune në disa kompani, gjykata nuk ka konstatuar një integrim dhe lidhje aq të thellë me vendin sa për të përjashtuar dëbimin.
Mbrojtja ka paralajmëruar ankesë në Gjykatën e Kantonit, e cila pritet të shqyrtojë nëse do të mbetet në fuqi vendimi i shkallës së parë. Deri në marrjen e një vendimi përfundimtar, burri mund të vazhdojë të qëndrojë në Zvicër me familjen e tij./Albinfo.ch
