Një 61-vjeçar me origjinë shqiptare ka humbur jetën tragjikisht në një aksident në vendin e punës në Itali. Viktima është identifikuar si B.R. i cili ndërroi jetë mëngjesin e së mërkurës në Casarano, në provincën e Leçes, transmeton albinfo.ch.
Sipas mediave italiane, aksidenti ndodhi në zonën Contrada Spagnolo, ku viktima, pronar i një kompanie ndërtimi, u godit nga një portë e madhe metalike rrëshqitëse, e cila u rrëzua papritur dhe e zuri poshtë.
Ekipet e emergjencës mbërritën menjëherë në vendngjarje, por ndërhyrja e tyre nuk arriti ta shpëtonte 61-vjeçarin. Mjekët konstatuan vdekjen e tij në vendin e aksidentit.
Në vendngjarje dolën edhe efektivët e Karabinierëve dhe inspektorët e SPESAL-it, institucioni përgjegjës për sigurinë në vendin e punës. Ata kanë nisur hetimet për të zbardhur shkaqet e rrëzimit të portës metalike dhe rrethanat që çuan në këtë aksident fatal. /Albinfo.ch
