Komisioni Evropian ka konstatuar paraprakisht se TikTok mund të ketë shkelur rregullat evropiane për shërbimet digjitale, për shkak të mënyrës se si funksionon platforma dhe rrezikut të krijimit të varësisë te përdoruesit, përcjell albinfo.ch.
Sipas gjetjeve të publikuara më 6 nëntor, shqetësimet lidhen me algoritmin që rekomandon vazhdimisht video, duke i nxitur përdoruesit të kalojnë periudha të gjata në platformë.
Komisioni vlerëson se funksione të tilla mund të ndikojnë negativisht në mirëqenien dhe shëndetin mendor të përdoruesve, veçanërisht të fëmijëve, adoleshentëve dhe personave më të cenueshëm.
Autoritetet evropiane konsiderojnë se masat aktuale të TikTok-ut për kufizimin e këtyre rreziqeve nuk janë të mjaftueshme dhe kërkojnë ndryshime në mënyrën e funksionimit të platformës.
Nëse shkeljet konfirmohen, TikTok mund të përballet me një gjobë deri në 6 për qind të qarkullimit të tij vjetor global, sipas Aktit të Shërbimeve Digjitale të Bashkimit Evropian.
Nga ana tjetër, TikTok ka kundërshtuar gjetjet e Komisionit Evropian, duke mbrojtur masat që ka ndërmarrë për sigurinë dhe mirëqenien e përdoruesve.
Hetimi është ende në zhvillim dhe kompania ka mundësi t’u përgjigjet pretendimeve përpara se autoritetet evropiane të marrin një vendim përfundimtar.
