Ministria e Arsimit dhe Shkencës (MASh) ka njoftuar se Inspektorati i Arsimit do të nisë nga java e ardhshme vizitat në shkollat e Kosovës, për të verifikuar nëse mjetet e subvencionimit janë përdorur për blerjen e teksteve shkollore, përcjell albinfo.ch.
Sipas njoftimit të Ministrisë, gjatë këtyre vizitave do të kontrollohet nëse nxënësit janë pajisur me librat e nevojshëm dhe nëse procesi mësimor po zhvillohet në mënyrë të rregullt.
Ministria u ka rikujtuar prindërve dhe kujdestarëve ligjorë se tekstet shkollore të subvencionuara për nxënësit nga klasa e parë deri në të nëntën duhet të mirëmbahen dhe të ruhen me kujdes gjatë vitit shkollor.
Në përputhje me Udhëzimin Administrativ Nr. 13/2016 dhe deklaratën e nënshkruar nga prindërit për vitin shkollor 2026/2027, tekstet e destinuara për ripërdorim duhet të kthehen në shkollë në përfundim të vitit mësimor.
Dorëzimi i librave do të bëhet te kujdestari i klasës, ndërsa ato duhet të jenë në gjendje të përshtatshme për t’u përdorur edhe nga gjeneratat e ardhshme.
MASh ka theksuar se këto masa synojnë të sigurojnë përdorimin e drejtë të mjeteve publike të ndara për subvencionimin e teksteve shkollore, si dhe ruajtjen e librave për përdorim të mëtejshëm.
