Dy persona kanë humbur jetën pas rrëzimit të një avioni të vogël në autostradën A2, në verilindje të qytetit Magdeburg në Gjermani, të premten pasdite, më 6 nëntor, përcjell albinfo.ch.
Sipas televizionit publik gjerman MDR, aksidenti ka ndodhur rreth orës 14:48, në segmentin ndërmjet Burgut dhe zonës së pushimit Krähenberge.
Avioni është përfshirë nga flakët pas përplasjes me rrugën, ndërsa ekipet e zjarrfikësve dhe të shpëtimit kanë ndërhyrë menjëherë në vendngjarje.
Policia gjermane ka konfirmuar se dy personat që ndodheshin në avion janë gjetur pa shenja jete.
Sipas informacioneve fillestare, asnjë automjet që po qarkullonte në autostradë nuk është përfshirë në aksident.
Pas ngjarjes, autostrada A2 është mbyllur në drejtim të Hannoverit, ndërsa autoritetet kanë nisur hetimet për të përcaktuar shkaqet e rrëzimit.
Ende nuk dihet çfarë e ka shkaktuar aksidentin, ndërsa pjesa më e madhe e avionit është shkatërruar nga përplasja dhe zjarri.
