Turizmi do të vijojë të jetë një nga prioritetet e zhvillimit ekonomik të Shqipërisë edhe në vitin 2027, me fokus rritjen e konkurrueshmërisë, diversifikimin e ofertës, zgjatjen e sezonit turistik dhe përmirësimin e cilësisë së shërbimeve.
Për vitin 2027, programi “Zhvillimi i Turizmit” mbështetet me një buxhet prej 848,5 milionë lekësh, i cili do të financojë ndërhyrje të lidhura me promovimin ndërkombëtar, zhvillimin e produkteve të reja turistike, mbështetjen e projekteve dhe aktorëve të sektorit, menaxhimin e destinacioneve dhe transformimin digjital të shërbimeve turistike.
Synimi është që rritja e turizmit të shoqërohet me më shumë organizim, më shumë formalizim dhe një përvojë më cilësore për vizitorët, duke rritur njëkohësisht kontributin e sektorit në ekonominë kombëtare.
Ministri i Turizmit, Kulturës dhe Sportit, Blendi Gonxhja thekson se “rritja e turizmit gjatë dekadës së fundit pasqyrohet edhe në numrin e vizitorëve të huaj. Nga 3,26 milionë hyrje në vitin 2013, Shqipëria arriti në rreth 12,5 milionë në vitin 2025, ndërsa në periudhën janar-shtator 2026 u regjistruan rreth 10,7 milionë hyrje, me rritje 4,9% krahasuar me të njëjtën periudhë të një viti më parë”.
Zgjerim ka shënuar edhe kalendari i aktiviteteve turistike, kulturore dhe sportive, shkruan ATSH, transmeton albinfo.ch.
“Gjatë nëntë muajve të parë të vitit 2026 u zhvilluan 2 107 aktivitete, nga 1 707 në të njëjtën periudhë të vitit 2025 dhe 1 413 në vitin 2024, duke shënuar rritje përkatësisht 23,4% dhe 49,1%”, tha Gonxhja.
Një nga prioritetet për vitin 2027 do të jetë promovimi ndërkombëtar i Shqipërisë përmes pjesëmarrjes në panairet kryesore turistike, përfshirë World Travel Market në Londër dhe ITB Berlin.
“Synimi është forcimi i bashkëpunimit me operatorët ndërkombëtarë, krijimi i kontakteve të reja tregtare dhe promovimi i vendit si destinacion për të gjitha stinët”, theksoi Gonxhja.
Në fokus do të jetë gjithashtu mbështetja e projekteve të sipërmarrjeve, organizatave dhe aktorëve lokalë për zhvillimin e turizmit kulturor, malor, rural dhe natyror. Kjo qasje synon zgjerimin e ofertës përtej destinacioneve tradicionale bregdetare dhe krijimin e mundësive të reja ekonomike për komunitetet lokale.
Paralelisht, Agjencia Kombëtare e Bregdetit dhe agjencitë rajonale do të mbështesin menaxhimin, monitorimin dhe administrimin e hapësirave bregdetare, ndërsa Agjencia Kombëtare e Turizmit do të vijojë promovimin e destinacionit Shqipëri dhe kalendarit të festave, festivaleve dhe aktiviteteve turistike, edhe përmes aplikacionit TEA.
Ministri Gonxhja vuri në dukje se “një risi për vitin 2027 është transformimi digjital i sektorit përmes platformës kombëtare eVisitor, e cila do të mundësojë regjistrimin elektronik dhe në kohë reale të vizitorëve në strukturat akomoduese. Platforma synon krijimin e një sistemi të unifikuar të të dhënave për flukset turistike dhe netqëndrimet, duke ndihmuar formalizimin dhe planifikimin e sektorit”.
“Në kuadër të këtij transformimi parashikohet edhe një aplikacion për turistët, që do të ofrojë informacion mbi destinacionet, agroturizmin, shtigjet dhe guidat turistike, kalendarin e aktiviteteve dhe blerjen online të biletave për evente. Aplikacioni do të përfshijë gjithashtu guida audio, përmbajtje interaktive, teknologji QR Code dhe një asistent virtual. Gjithashtu, do të zhvillohet sistemi i biletarisë elektronike për muzetë, parqet arkeologjike dhe sitet e trashëgimisë kulturore, duke mundësuar blerjen online, verifikimin elektronik të biletave dhe raportimin e të ardhurave”, nënvizoi Gonxhja.
Në drejtim të bashkëpunimit ndërkombëtar, do të vijojë projekti “Friendship Routes”, në kuadër të Programit të Bashkëpunimit Ndërkufitar Mali i Zi-Shqipëri 2021–2027, që synon krijimin e itinerareve të përbashkëta turistike dhe promovimin e trashëgimisë kulturore e natyrore të të dy vendeve.
Një tjetër projekt strategjik është Projekti për Zhvillimin e Integruar të Ekosistemit Turistik, i cili synon përmirësimin e planifikimit dhe menaxhimit të destinacioneve, nxitjen e investimeve private dhe diversifikimin e ofertës turistike. “Për përgatitjen e tij parashikohet një grant deri në 3 milionë dollarë nga Banka Botërore, për hartimin e planit të integruar të turizmit, identifikimin e investimeve prioritare, studimet e fizibilitetit dhe forcimin e kapaciteteve institucionale. Zbatimi do të realizohet nga Fondi Shqiptar i Zhvillimit”, tha Gonxhja.
