Një ngjarje e rëndë është regjistruar në Bulqizë të Shqipërisë, ku një burrë rreth 53 vjeç ka ndërruar jetë pasi dyshohet se është sulmuar dhe kafshuar nga një ari, përcjell albinfo.ch.
Sipas njoftimit paraprak të Policisë, rreth orës 14:10, Spitali i Bulqizës ka njoftuar Komisariatin e Policisë se familjarët e shtetasit me inicialet U. F., rreth 53 vjeç, kishin kërkuar ndihmë mjekësore, pasi ai dyshohej se ishte sulmuar dhe kafshuar nga një kafshë e egër, konkretisht një ari.
Pas marrjes së njoftimit, shërbimet policore dhe grupi hetimor kanë shkuar në vendngjarje, ku kanë konstatuar se 53-vjeçari kishte ndërruar jetë.
Trupi i pajetë është dërguar në Institutin e Mjekësisë Ligjore për ekzaminime të mëtejshme, ndërsa grupi hetimor, nën drejtimin e Prokurorisë, po punon për të sqaruar dhe dokumentuar plotësisht rrethanat e ngjarjes./Albinfo.ch
