Pjesëtarët e Forcës së Sigurisë së Kosovës (FSK) dhe efektivët e Bazës së Mbështetjes dhe Emergjencave Civile të Shqipërisë kanë zhvilluar një stërvitje të përbashkët për kërkim-shpëtim malor në Prevallë të Prizrenit, përcjell albinfo.ch.
Stërvitja është mbajtur nga 2 deri më 5 nëntor 2026, me qëllim të shkëmbimit të përvojave profesionale, testimit të pajisjeve të reja dhe përmirësimit të teknikave të kërkim-shpëtimit.
Gjatë aktivitetit, pjesëmarrësit kanë realizuar ushtrime praktike në terrene malore, përfshirë edhe evakuimin e një personi të lënduar, duke testuar koordinimin dhe gatishmërinë për ndërhyrje në situata emergjente.
Lajmin e ka bërë të ditur ministri i Mbrojtjes i Shqipërisë, Ermal Nufi, i cili ka publikuar edhe pamje nga stërvitja e përbashkët.
Sipas tij, aktiviteti ka kontribuar në forcimin e kapaciteteve profesionale, rritjen e bashkëveprimit dhe thellimin e bashkëpunimit ndërmjet strukturave të Kosovës dhe Shqipërisë.
Stërvitje të tilla synojnë përgatitjen më të mirë të ekipeve për operacione shpëtimi dhe reagim të koordinuar në raste emergjente, veçanërisht në zonat malore ku ndërhyrjet paraqesin vështirësi të mëdha.
