Rritja e vazhdueshme e çmimeve të produkteve dhe shërbimeve bazë po rëndon gjithnjë e më shumë buxhetet e familjeve në Kosovë. Sipas ekspertit të ekonomisë, Pëllumb Çollaku, për të përballuar të njëjtin nivel konsumi si një vit më parë, familjet duhet të shpenzojnë rreth 78 euro më shumë në muaj, raporton albinfo.ch.
Në një intervistë për Telegrafin, doktori i shkencave ekonomike ka bërë të ditur se një shportë konsumi që në shtator të vitit 2025 kushtonte 1.000 euro, sot arrin në rreth 1.078 euro.
Sipas tij, kjo nënkupton një shpenzim shtesë prej afro 940 eurosh në vit për të njëjtin nivel konsumi.
“Shporta që në shtator 2025 kushtonte 1.000 euro, sot kushton rreth 1.078 euro. Për të njëjtin konsum, familja paguan rreth 78 euro më shumë në muaj, ose afro 940 euro në vit”, ka deklaruar Çollaku.
Ai ka theksuar se rritja e çmimeve prek më së shumti familjet me të ardhura të ulëta, të cilat shpenzojnë pjesën më të madhe të buxhetit për ushqim, energji, ngrohje dhe transport.
Sipas Çollakut, humbje të fuqisë blerëse kanë pësuar edhe pensionistët, familjet me të ardhura të pandryshuara, punëtorët me paga të ngrira, të punësuarit në sektorin informal dhe personat që jetojnë nga ndihma sociale.
Në këtë kontekst, ai ka përmendur edhe ndikimin e indeksimit të pensioneve me vetëm 2,7 për qind, që sipas tij nuk është i mjaftueshëm për të kompensuar rritjen e kostos së jetesës.
Shrinkflation, produktet zvogëlohen por çmimi mbetet i njëjtë
Një tjetër shqetësim që Çollaku ka ngritur është fenomeni i njohur si “shrinkflation”, përmes të cilit prodhuesit zvogëlojnë peshën ose sasinë e produkteve, pa e ulur çmimin e tyre.
Sipas tij, ky fenomen po bëhet gjithnjë e më i pranishëm në tregun kosovar, por ende nuk ka marrë vëmendjen e duhur nga institucionet përgjegjëse dhe politikëbërësit.
“Përveç humbjes së fuqisë blerëse, konsumatori kosovar po përballet edhe me fenomenin ‘shrinkflation’, apo zvogëlimin e peshës ose sasisë së një produkti të caktuar pa ulje çmimi”, ka deklaruar ai.
Ndërkohë, sipas projeksioneve të Fondit Monetar Ndërkombëtar (FMN), inflacioni në Kosovë gjatë vitit 2026 pritet të arrijë në 6,8 për qind, krahasuar me 3,9 për qind sa ishte vlerësuar për vitin 2025.
Kjo paraqet një rritje prej 2,9 pikë përqindjeje dhe e rendit Kosovën në krye të vendeve të Ballkanit Perëndimor për nivelin e inflacionit të parashikuar./Albinfo.ch
