24-vjeçari ishte detyruar të zbriste në Potsdam, por u ngjit sërish në trenin në nisje dhe udhëtoi në një pozicion tejet të rrezikshëm deri në Magdeburg.
Një shtetas 24-vjeçar i Shqipërisë është vënë disa herë në rrezik për jetën në Gjermani, pasi dyshohet se është ngjitur në hapësirën ndërmjet vagonëve të një treni të shpejtë Intercity-Express (ICE), pasi ishte detyruar të zbriste për shkak se nuk kishte biletë udhëtimi, raporton albinfo.ch.
Ngjarja ka ndodhur të dielën në mbrëmje, më 8 nëntor, gjatë udhëtimit të trenit nga Berlini në drejtim të Potsdamit. Gjatë kontrollit të biletave, i riu nuk ka mundur t’i paraqesë kontrollores as biletën e nevojshme dhe as një dokument identifikimi. Për këtë arsye, atij i është kërkuar të zbresë në stacionin e Potsdamit, pak para orës 22:00, njoftojnë mediat gjermane TAG24 dhe Newsflash24.
Megjithatë, sipas hetimeve të policisë, 24-vjeçari është ngjitur sërish në tren gjatë largimit të tij nga stacioni dhe është vendosur në hapësirën ndërmjet dy vagonëve, duke vazhduar kështu udhëtimin në një pozicion jashtëzakonisht të rrezikshëm.
Rreth një orë më vonë, në stacionin kryesor të Magdeburgut, në orën 22:58, personeli i trenit e ka vërejtur të riun duke dalë nga hapësira ndërmjet vagonëve. Më pas, ai ka kaluar përmes platformës dhe ka hyrë në zonën e shinave hekurudhore.
Pas njoftimit, pjesëtarët e Policisë Federale gjermane e kanë lokalizuar dhe e kanë shoqëruar në ambientet e policisë për veprime të mëtejshme. Gjatë marrjes në pyetje, i riu ka pranuar se kishte udhëtuar ndërmjet vagonëve të trenit ICE, transmeton tutje albinfo.ch.
Ndaj tij do të ngrihet kallëzim penal për shmangie të pagesës së udhëtimit, si dhe për shkelje të tjera të mundshme të Kodit Penal dhe rregulloreve për ndërtimin dhe funksionimin e hekurudhave.
Policia Federale në Magdeburg ka rikujtuar se qëndrimi në pjesën e jashtme të trenave, ashtu si edhe hyrja në zonën e shinave hekurudhore, përbën rrezik serioz për jetën./Albinfo.ch
